რუსი უფლებადამცველის, მარკ ფეიგინის თქმით, საქართველოს პრეზიდენტის კომენტარის მოსმენის შემდეგ რჩება შთაბეჭდილება, რომ სალომე ზურაბიშვილს მიხეილ სააკაშვილის საკითხის გადაწყვეტა არ შეუძლია. 
ის ფიქრობს, რომ ზურაბიშვილი ცდილობს პასუხისმგებლობა მოიხსნას.

"ჩვენ მოვისმინეთ სალომე ზურაბიშვილის კომენტარი და ისეთი შთაბეჭდილება იქმნება, რომ მას ამ საკითხის არათუ გადაწყვეტის, არამედ განხილვის საშუალებაც კი არა აქვს. მე მქონდა შეგრძნება, რომ ის ცდილობს პასუხისმგებლობა მოიხსნას. ის ამბობს, რომ პარტიებს შორის დაპირისპირებაა, რაც ცოტა უცნაურია. რა მნიშვნელობა აქვს, რას აკეთებენ პარტიები? არსებობს ადამიანი, რომელსაც ჯანმრთელობის სერიოზული პრობლემები აქვს და ამის დადგენა მარტივია, მაგრამ შთაბეჭდილება იქმნება, რომ სალომე ზურაბიშვილს ამ საკითხის გადაწყვეტა არ შეუძლია", - ამბობს ფეიგინი. 

ცნობისთვის, გუშინ მარკ ფეიგინის ინიციატივით, მსოფლიოს სხვადასხვა ქალაქში მიხეილ სააკაშვილის მხარდამჭერი აქცია გაიმართა. ევროპასა და ამერიკაში უკრაინისა და საქართველოს, ასევე სხვა ქვეყნების მოქალაქეები შეიკრიბნენ და მესამე პრეზიდენტის სამკურნალოდ სხვა ქვეყანაში გადაყვანა მოითხოვეს.