ხარკოვის რეგიონში, ბორივის რაიონში კიდევ ერთი მასობრივი სამარხი იპოვეს. უკრაინის ეროვნული პოლიციის ინფორმაციით, სამარხში აღმოჩენილია  სულ მცირე 17 ადამიანის ცხედარი. როგორც მშვიდობიანი მოქალაქეების, ისე ჯარისკაცების.

"წინასწარი მონაცემებით, საფლავში სულ მცირე 17 ადამიანია დაკრძალული - მშვიდობიანი მოქალაქეები და შეიარაღებული ძალების ჯარისკაცები. გამომძიებლებმა სამი სამხედრო მოსამსახურის ცხედარი პირველ დღეს ამოიღეს", - აცხადებენ პოლიციაში.

უკრაინელ სამართალდამცველებს მასობრივი სასაფლაოს შესახებ ინფორმაცია სოფელ კოპანკის მცხოვრებლებმა მიაწოდეს.

„ადგილობრივებმა გამოძიებას განუცხადეს, რომ ოკუპანტებმა დაღუპულების ცხედრები შეაგროვეს და 13 აპრილს, ორი სატვირთო მანქანით ჩამოიტანეს, ამოთხარეს 3 მეტრამდე სიღრმის ორმო და ყველა ცხედარი იქ ჩაყარეს. ამის შემდეგ, სამარხი ტანკებით გადაასწორეს“, - ნათქვამია პოლიციის ინფორმაციაში. 

სამარხიდან ამოღებულ ყველა ცხედარს სასამართლო ექსპერტიზაზე გადაასვენებენ, სადაც სიკვდილის მიზეზები და მათი ვინაობა დადგინდება. 
შეგახსენებთ, რომ ხარკოვის რეგიონის დეოკუპირებულ ტერიტორიაზე მასობრივი სამარხი უკრაინის ეროვნულმა პოლიციამ სექტემბერშიც აღმოაჩინა. ქალაქ იზიუმის სამარხებში მაშინ 500-მდე უკრაინელის ცხედარი იპოვეს.