"გირჩი მეტი თავისუფლება", "დროა" და "სტრატეგია აღმაშენებელი" ერთობლივ განცხადებას არვცელებს და მმართველ პარტიას მიმართავს. ისინი ამბობენ, რომ მზად არიან ნებისმიერ ხელისუფლების მიერ "კონტროლირებად" სატელევიზიო არხზე მივიდნენ და პუნქტების მიხედვით აუხსნან, რატომ ვერ მივიღებთ ევროკავშირის კანდიდატი ქვეყნის სტატუსს.

"მივმართავთ “ქართულ ოცნებას”, თუ ივანიშვილი ნებას დაგრთავთ, მზად ვართ თქვენთან ერთად ნებისმიერ თქვენს მიერ კონტროლირებად სატელევიზიო არხზე დავსხდეთ, თქვენივე წამყვანით, პუნქტ-პუნქტ გავყვეთ ევროკომისიის მოთხოვნათა ჩამონათვალს და აგიხსნათ, რა პრობლემას ხედავენ ევროპელები თითოეულ პუნქტთან მიმართებაში თქვენს მიერ გადადგმულ თუ არ გადადგმულ ნაბიჯებთან დაკავშირებით და რატომ არის უკვე უკიდურესად დაბალი ალბათობა იმისა, რომ მომავალი წლის ბოლოს საქართველომ მიიღოს ევროკავშირის წევრობის კანდიდატის სტატუსი. თუ ნებას დაგრთავთ, რა თქმა უნდა", - წერია განცხადებაში. 

რამდენიმე დღის წინ, ბრიუსელიდან დაბრუნების შემდეგ გიორგი ვაშაძემ და ზურაბ ჯაფარიძემ ერთობლივი ბრიფინგიც გამართეს, რასაც მათი თქმით "ოცნების" მხრიდან  სრულიად უპასუხისმგებლო და სასაცილო კომენტარები მოჰყვა - "ისევე როგორც სიუჟეტები სამთავრობო სატელევიზიო არხებზე, გვიწოდეს „უსაქმურები“, „ქვეყნის მტრები“ და ა.შ.". 
პარტიები ამბობენ, რომ ევროკავშირის აზრით, საქართველოს ყველა წინაპირობა ჰქონდა, იმისათვის რომ 2022 წლის ივნისში ევროკავშირის წევრობის კანდიდატის სტატუსი მიეღო, თუმცა "ოცნების" მხრიდან გადადგმულმა ნაბიჯებმა, და არ გადადგმულმა ნაბიჯებმაც განაპირობა სტატუსზე უარი. მათივე განცხადებით, 2022 წლის ბოლოს, ევროკომისიის 12 პუნქტთან მიმართებაში, მაღალი ალბათობით რაიმე სახის შეფასება არ იქნება.