რუსეთი უკრაინაში პროვოკაციისთვის ემზადება. ამის შესახებ ოფიციალურმა კიევმა მას შემდეგ განაცხადა, რაც რუსეთის თავდაცვის მინისტრმა აშშ-ის, გაერთიანებული სამეფოს, საფრანგეთისა და თურქეთის თავდაცვის მინისტრებთან სატელეფონო საუბარში განაცხადა, რომ უკრაინა ომში "ბინძური ბომბით" პროვოკაციას გეგმავს.
დმიტრო კულებას შეფასებით, რუსეთის დეზინფორმაციის კამპანია, შესაძლოა, მიზნად ისახავდეს ცრუ დროშის ოპერაციის საბაბის შექმნას, რაზეც ის ტელეფონით აშშ-ის სახელმწიფო მდივანს ესაუბრა. თავის მხრივ აშშ-ის, გაერთიანებული სამეფოსა და საფრანგეთის თავდაცვის მინისტრებმა განაცხადეს, რომ უარყოფენ რუსეთის ცხადად ცრუ ბრალდებებს და ასევე რუსეთის მხრიდან ესკალაციის ნებისმიერ საბაბს.
რუსულ პროპაგანდასა და შოიგუს ბრალდებებს უკრაინის პრეზიდენტიც გამოეხმაურა. ვოლოდიმირ ზელენსკის თქმით, ევროპაში ბირთვული იარაღის გამოყენება მხოლოდ რუსეთს შეუძლია.

"რუსეთის თავდაცვის მინისტრი, სერგეი შოიგუ აწყობს სატელეფონო კარუსელს, ურეკავს საგარეო საქმეთა მინისტრებს და ესაუბრება რაღაც ბინძური ბირთვული ბომბის შესახებ. ყველამ კარგად იცის, ვინ არის ამ ომში ყველა სიბინძურის წყარო, რისი წარმოდგენაც კი შეიძლება.
თუ ვინმეს შეუძლია გამოიყენოს ატომური იარაღი ევროპის ჩვენ ნაწილში ეს მხოლოდ ერთი სუბიექტია და ამ სუბიექტმა უბრძანა ამხანაგ შოიგუს, სადმე დაერეკა. თუ რუსეთი რეკავს და ამბობს, თითქოს უკრაინა რაღაცას ამზადებს, ეს ნიშნავს ერთს - რუსეთმა უკვე მოამზადა ეს ყველაფერი, ახლა მსოფლიომ მაქსიმალურად მკაცრი რეაგირება უნდა მოახდინოს", - თქვა ვოლოდიმირ ზელენსკიმ.