„თუკი ვინმეს ომი უნდა, დაუწყია და ომის საფრთხე შეუქმნია, განსაკუთრებით ჩვენს რეგიონში ასწლეულების განმავლობაში, ეს პუტინის რუსეთია“, - ამის შესახებ „ერთიანი ნაციონალური მოძრაობის“ თავმჯდომარემ ნიკა მელიამ განაცხადა. ნიკა მელიას განცხადებით, უკრაინაში პუტინის მიზნები და ამოცანები ვერ სრულდება და ის აგებს ომს. 
"რუსეთი, რომელიც 3 დღეში აპირებდა უკრაინის დაჩოქებას, აღებას, დღეს გეგმავს, რომელიმე უკრაინის რაიონში 3 საათით მაინც შეუწყვიტოს ელექტროენერგია ენერგოობიექტების განადგურების წყალობით. აი, საიდან სადამდე დავიდა პუტინის ხელისუფლება უკრაინაში შეჭრის შემდეგ. მისი მიზნები და ამოცანები ვერ სრულდება, უკრაინა ომს იგებს, წინ მიიწევს და ცოტა ხანში ხერსონს დაიბრუნებს. 
რამ გადატეხა ომის მიმდინარეობა? გადატეხა უკრაინელების რწმენამ გამარჯვების და, რა თქმა უნდა, პრეზიდენტ ზელენსკის თანმიმდევრულობამ და მისმა სამართლიანმა მოთხოვნამ, დასავლური ცივილიზებული სამყაროს მიმართ, რომელიც არც ერთხელ, არასოდეს არ დარჩენილა უყურადღებოდ და უპასუხოდ.
ზელენსკის ეს გადაწყვეტილება [ბიძინა ივანიშვილის ნათესავების დასანქცირება] მწიფდებოდა. ეს მწიფდებოდა არა მარტო კიევში, არამედ მსოფლიო ლიდერებთან. ივანიშვილმა ყველაზე კარგად იცის რატომ არ არის ჯერ მოყოლილი სანქციებში. 
თუკი ვინმეს ომი უნდა, დაუწყია და ომის საფრთხე შეუქმნია, განსაკუთრებით ჩვენს რეგიონში ასწლეულების განმავლობაში, ეს პუტინის რუსეთია“, - აცხადებს ნიკა მელია.