რუსეთის პრეზიდენტმა ვლადიმერ პუტინმა განაცხადა, რომ ყირიმის ხიდის დანგრევის შემსრულებლები და დამკვეთები უკრაინის სპეცსამსახურები არიან. ამის შესახებ მან საგამოძიებო კომიტეტის თავმჯდომარე ალექსანდრე ბასტრიკინთან შეხვედრაზე განაცხადა.
საგამოძიებო კომიტეტის ხელმძღვანელმა „ტერორიზმის“ მუხლით სისხლის სამართლის საქმის აღძვრა გამოაცხადა. მან პუტინს ასევე აცნობა აფეთქების მომზადებაში მონაწილე ეჭვმიტანილების ვინაობა.
„ჩვენ უკვე დავადგინეთ სატვირთო მანქანის მარშრუტი. ესენია: ბულგარეთი, საქართველო, სომხეთი, ჩრდილოეთ ოსეთი, კრასნოდარი. გადამზიდველები იდენტიფიცირებულია. „ეფესბეს“ ოპერატიული თანამშრომლების დახმარებით მოვახერხეთ ეჭვმიტანილების იდენტიფიცირება. მათ შორის, ვისაც შეეძლო ტერორისტული თავდასხმის მომზადება“, - განაცხადა მან.
თავად რუსეთის პრეზიდენტმა კი განაცხადა:
„როგორც ახლახან მოგახსენეთ, ეჭვგარეშეა. ეს არის ტერორისტული თავდასხმა, რომელიც მიზნად ისახავს რუსეთის ფედერაციის კრიტიკული სამოქალაქო ინფრასტრუქტურის განადგურებას“.