ჩრდილოეთ კავკასიის ბევრ მცხოვრებს, რომლებიც ქვეყანაში „ნაწილობრივი მობილიზაციის“ გამოცხადების შემდეგ რუსეთის დატოვებას ცდილობენ, საქართველოში არ უშვებენ. ამის შესახებ „ეხო კავკაზა“ წერს.
კერძოდ, აღნიშნული ინფორმაციის შესახებ წერია ზემო ლარსის ტელეგრამის ჩატში, რომელიც უკვე 124 ათასზე მეტ ადამიანს აერთიანებს. ვრცელდება ინფორმაცია, რომ კავკასიელებს დაკითხვაზე ცალკე ოთახში აგზავნიან (საუბარია 222 ნომერზე, რომლის შესახებაც მედია ადრეც საუბრობდა), რის შემდეგაც მათ უარს ეუბნებიან.
ჩეჩნეთის ხელმძღვანელის რამზან კადიროვისგან დევნილი ევროპაში მცხოვრები ბლოგერის, ტუმსო აბდურახმანოვის თქმით, შესაძლოა, რუსეთის მხრიდან გარკვეული ბრძანებაა გაცემული, რომ ქართველებმა კავკასიელები ქვეყანაში არ შეუშვან. მისი თქმით, უცნაურია, რომ საზღვარზე რუსეთის მოქალაქეებს უშვებენ, კავკასიელებს კი არა.
ის, ასევე, დარიალის ხეობაში არსებულ სიტუაციაზეც საუბრობს და აღნიშნავს, რომ საგუშაგოზე უამრავი ადამიანია შეკრებილი.