ოკუპირებული აფხაზეთის დე ფაქტო პრეზიდენტმა ასლან ბჟანიამ დღეს განაცხადა, რომ მომხრეა მოხდეს შეთანხმების რატიფიცირება, რომელიც რუსეთის საკუთრებაში „ბიჭვინთის“ ე.წ. სახელმწიფო აგარაკების ტერიტორიაზე არსებული ობიექტის გადაცემას ითვალისწინებს. ამის შესახებ „რია ნოვოსტი“ იუწყება.
„ჩემი მხრიდან მზად ვარ, ვუპასუხო როგორც ოპოზიციის, ისე მთლიანობაში მოქალაქეების ყველა კითხვას, რომელთა შორის აღნიშნული შეთანხმება შეშფოთებას იწვევს. მიმაჩნია, რომ საჭიროა ამ შეთანხმების რატიფიცირება და მე აბსოლუტურად დარწმუნებული ვარ ამ გადაწყვეტილების სისწორეში“, - განაცხადა ბჟანიამ.
მანვე დასძინა, რომ ოკუპირებული აფხაზეთისთვის ამ დოკუმენტს არავითარი საფრთხე არ მოაქვს.
აფხაზური ოპოზიცია დე ფაქტო პარლამენტის მიერ აღნიშნული შეთანხმების რატიფიცირების წინააღმდეგია და აცხადებს, რომ დოკუმენტში არის მუხლები, რომლებიც ოკუპირებული აფხაზეთის ე.წ. კონსტიტუციას ეწინააღმდეგება.