ბაიდენის ადმინისტრაციის წარმომადგენლებმა ოთხშაბათს, ამერიკელ კანონმდებლებთან საიდუმლო ბრიფინგზე განაცხადეს, რომ 75 000-ზე მეტი რუსი ჯარისკაცი დაიღუპა ან დაიჭრა უკრაინაში ომის დროს.

"ჩვენ შეგვატყობინეს, რომ 75 000-ზე მეტი რუსი დაიღუპა ან დაიჭრა, რაც ძალიან დიდი რიცხვია, თქვენ გაქვთ წარმოუდგენელი ინვესტიციები მათ სახმელეთო ძალებში, მათი სახმელეთო ძალების 80%-ზე მეტი გაჭედილია და ისინი დაიღალნენ. მაგრამ ისინი მაინც რუსი სამხედროები არიან", - განაცხადა მიჩიგანის წარმომადგენელმა ელისა სლოტკინმა, დემოკრატმა, რომელიც მსახურობს პალატის შეიარაღებული ძალების კომიტეტში.

კრემლის სპიკერმა დიმიტრი პესკოვმა ეს ციფრი უარყო:

"ეს არ არის ამერიკის ადმინისტრაციის განცხადება. ეს არის საგაზეთო სტატია. დღესდღეისობით ყველაზე ცნობილი გაზეთებიც კი არ ერიდებიან ყოველგვარი ყალბი ინფორმაციის გავრცელებას. ეს, სამწუხაროდ, სულ უფრო და უფრო გავრცელებული პრაქტიკაა", - თქვა მან ხუთშაბათს ჟურნალისტებთან. 

CNN წერს, რომ რთულია ომში დაღუპულთა რიცხვის დამოუკიდებლად შეფასება. როგორც რუსი, ასევე უკრაინელი ოფიციალური პირები, ზოგჯერ გაზვიადებულად აფასებენ სამხედრო წინსვლას და ამცირებენ წარუმატებლობას.
კრემლი მსხვერპლის შესახებ ინფორმაციას რეგულარულად არ ანახლებს. 25 მარტს რუსეთის თავდაცვის სამინისტრომ განაცხადა, რომ 1,351 ჯარისკაცი დაიღუპა უკრაინაში შეჭრის პირველ თვეს, თუმცა შემდეგ არანაირი განახლება არ გაუკეთებია.

"ბრიფინგზე მთავარი საუბრის თემა იყო, მეტი რა შეგვიძლია და რა უნდა გავაკეთოთ უკრაინელებისთვის, ფაქტიურად უახლოეს სამ-ექვს კვირაში, ძალიან სასწრაფოდ. უკრაინელებს სურთ წავიდნენ სამხრეთში და ოპერაციები ჩაატარონ. და ჩვენ გვინდა, რომ ისინი იყვნენ რაც შეიძლება წარმატებულები", - თქვა სლოტკინმა.

ამერიკელი და დასავლელი ოფიციალური პირები მიიჩნევენ, რომ უკრაინა მიზნად ისახავს დაიბრუნოს სამხრეთ ქალაქ ხერსონი, რომელიც მარტიდან რუსეთის მიერ ოკუპირებულია.