ოკუპირებულ ნოვაია კახოვკაში რუსების საბრძოლო მასალის საწყობი განადგურდა. არსებული ინფორმაციით, არიან დაღუპულები და დაჭრილები, თუმცა მონაცემები დაზუსტებული ჯერჯერობით არ არის. სამხედრო რეგიონული ადმინისტრაციის სპიკერის, სერხი ბრაჩუკის ინფორმაციით, ხერსონის ოლქის აღნიშნულ ტერიტორიაზე შემთხვევა დღეს დილით მოხდა. აფეთქება საკმაოდ ძლიერი იყო. 
ოკუპანტების საწყობების განადგურების ეს უკვე მესამე შემთხვევაა.
შეგახსენებთ, ხერსონი და რეგიონის ნაწილი რუსეთის შეჭრიდან მალევე მოექცა ოკუპაციაში და აგრესორი იქ "რეფერენდუმის" ჩატარებას გეგმავს. პერიოდულად თარიღებსაც ასახელებენ, თუმცა ამ დრომდე ის არ ჩატარებულა. გარდა ამისა, ოკუპანტები რეპრესიებს ახორციელებენ მშვიდობიანი მოსახლეობის წინააღმდეგ, რომლებიც აქტიურად უპირისპირდებიან მათ, აწყობენ საპროტესტო აქციებს ლოზუნგით - ხერსონი უკრაინაა.