უკრაინის პრეზიდენტის მრჩეველი, მიხაილო პოდოლიაკი რუსეთის პრეზიდენტს, ვლადიმირ პუტინს გამოეხმაურა, რომელმაც გუშინ საპარლამენტო ფრაქციების ლიდერებთან შეხვედრაზე აღნიშნა, რომ რუსეთს უკრაინაში ომი სერიოზულად ჯერ არ დაუწყია. 
"დღეს ჩვენ გვესმის, რომ მათ ჩვენი ბრძოლის ველზე დამარცხება უნდათ. ნუ, რა უნდა ვთქვა? დაე, სცადონ. ჩვენ გამუდმებით გვესმის, რომ დასავლეთს იქამდე უნდა ჩვენთან ომი, სანამ ბრძოლის ველზე უკანასკნელი უკრაინელი არ დარჩება. ეს ტრაგედიაა უკრაინელი ხალხისთვის, თუმცა, ეტყობა, ყველაფერი ამისკენ მიდის. მაგრამ, მინდა ყველას ესმოდეს, რომ ჩვენ იქ დიდწილად სერიოზულად ჯერ არაფერი დაგვიწყია. ამასთან ერთად, ჩვენ არ ვამბობთ უარს მშვიდობიან მოლაპარაკებებზე და ვინც უარს ამბობს, უნდა იცოდნენ, რომ რაც უფრო გაიწელება, მით უფრო რთული იქნება ჩვენთან მოლაპარაკება". – თქვა პუტინმა.
პოდოლიაკმა საპასუხოდ ისაუბრა უკრაინის შეიარაღებული ძალების მიერ დაანგარიშებულ რუსეთის მსხვილ დანაკარგზე და აღნიშნა, რომ კრემლი ომს სტალინის მათემატიკით განსჯის. 
"37 000 მკვდარი რუსი ჯარისკაცი. დაშავებული 98-117 ათასი ადამიანი. 10 ლიკვიდრებული გენერალი. 1605 განადგურებული ტანკი, ნაფლეთებად ქცეული 405 თვითმფრინავი/შვეულმფრენი. რუსეთს ბრძოლა ჯერ არ დაუწყია? კრემლი ომს მხოლოდ სტალინის მათემატიკით განსჯის – 20 მილიონი დაღუპულით?".  – წერს პოდოლიაკი.