რუსეთის პრეზიდენტმა ვლადიმირ პუტინმა გააფრთხილა დასავლეთი და უკრაინა, რომ "ომი შესაძლოა, გაგრძელდეს მანამ, ვიდრე ერთი უკრაინელი მაინც იდგება ფეხზე".
„დღეს გვესმის, რომ ბრძოლის ველზე ჩვენი დამარცხება უნდათ. აბა, რა ვთქვა? დაე, სცადონ. ჩვენ განუწყვეტლივ გვესმოდა, რომ დასავლეთი მზადაა, იბრძოლოს ჩვენთან მანამ, ვიდრე ერთი უკრაინელი მაინც იდგება ფეხზე. ეს ტრაგედიაა უკრაინელი ხალხისთვის. თუმცა, როგორც ჩანს, ყველაფერი ამისკენ მიდის", - განაცხადა პუტინმა.
იგი ირწმუნება, რომ რუსეთი სამშვიდობო მოლაპარაკებებზე უარს არ ამბობს, თუმცა, მისი თქმით, რაც დრო გავა, შეთანხმების მიღწევა უფრო რთული გახდება:
"ჩვენ არ ვამბობთ უარს სამშვიდობო მოლაპარაკებებზე. მაგრამ ვინც უარს ამბობს, უნდა იცოდეს, რომ რაც უფრო გაგრძელდება [კონფლიქტი], მით უფრო გაუჭირდებათ ჩვენთან მოლაპარაკება".
ცნობისთვის: რუსული ძალები ამჟამად დონბასის რეგიონის აღებას ცდილობენ. რუსეთმა უკრაინაში სრულმასშტაბიანი ომი 24 თებერვალს დაიწყო. რუსული ჯარები უკრაინაში შეიჭრნენ სამი მხრიდან — ჩრდილოეთიდან (ბელარუსი), აღმოსავლეთიდან (დონეცკი-ლუგანსკი) და სამხრეთიდან (ყირიმი). უკრაინაში შეჭრას წინ უძღოდა პრეზიდენტ ვლადიმირ პუტინის მიერ დონეცკისა და ლუგანსკის ე.წ. სახალხო რესპუბლიკების „დამოუკიდებლობის“ აღიარება. პუტინს უკრაინაში „სპეციალური სამხედრო ოპერაციის“ მიზნად გამოცხადებული აქვს უკრაინის „დემილიტარიზაცია და დენაციფიკაცია“. რუსული არმია უკრაინაში ბომბავს არა მხოლოდ სამხედრო, არამედ სამოქალაქო ობიექტებსაც. ომმა უკვე იმსხვერპლა ასეულობით მშვიდობიანი უკრაინელის სიცოცხლე. გაერო–ს მონაცემებით, სადღეისოდ ლტოლვილების რაოდენობამ 6,5 მილიონს გადააჭარბა.
დასავლეთის რიგი ქვეყნები უკრაინას სამხედრო დახმარებას უწევენ.
რუსეთს უკრაინაში სამხედრო ინტერვენციის გამო დასავლეთი რუსეთს ყოველდღიურად უფრო და უფრო მკაცრ სანქციებს უწესებს.