რუსულმა სამთავრობო მედიამ, ТАСС-მა გაავრცელა ინფორმაცია, რომლის მიხედვით, უკრაინამ აშშ-ს სთხოვა ქალაქ ხარკოვში THAAD-ის ტიპის ანტისარაკეტო სისტემების განთავსება, რასაც კრემლის სპიკერი, დმიტრი პესკოვი გამოეხმაურა და თქვა, რომ ამ სისტემის განთავსება დესტაბილიზაციისკენ გადადგმული ნაბიჯი იქნება. 
რუსული სამთავრობო მედიის ცნობით, მათ დიპლომატიურმა წყარომ მიაწოდა ინფორმაცია, რომ უკრაინულმა მხარემ აშშ-ს სთხოვა ქალაქ ხარკოვთან THAAD-ის (Terminal High Altitude Area Defense) ტიპის ანტისარაკეტო თავდაცვის სისტემის რამდენიმე დივიზიონის განთავსება. ასევე, რუსული მედიის დაუზუსტებელი ინფორმაციით, უკრაინა ითხოვს THAAD-ის კომპლექსში შემავალ რადიოლოკაციურ AN/TPY-2-ის ტიპიის სადგურებს. რუსული მედიის უცნობი წყაროს თქმით, ეს რადიოლოკაციური სადგურები უკრაინას რუსეთის ტერიტორიაზე 1000-კილომეტრიანი რადიუსის "ხედვას" მისცემს.
ТАСС-ის ინფორმაციასთან დაკავშირებით კომენტარი გააკეთა კრემლის სპიკერმა, დმიტრი პესკოვმა. 
"ეს გახდებოდა სიტუაციის დესტაბილიზაციისკენ გადადგმული კიდევ ერთი ნაბიჯი", – თქვა პესკოვმა რუსული სამთავრობო მედიის დაუზუსტებელ ინფორმაციაზე. 
შეგახსენებთ, რომ THAAD-ის ამერიკული ანტისარაკეტო კომპლექსი არის მობილური თავდაცვითი სისტემა, რომელიც განკუთვნილია მოკლე და საშუალო რადიუსის მქონე ბალისტიკური რაკეტების უვნებელსაყოფად.