სენაკში ოპოზიციის მერობის საერთო კანდიდატი კობა ნაყოფია რუსთავის მე-12 სასჯელაღსრულების დაწესებულებაში მიხეილ სააკაშვილთან შესახვედრად მივიდა. შესვლამდე ნაყოფიამ მედიასთან კომენტარი გააკეთა და ხელისუფლებას მოუწოდა, მიხეილ სააკაშვილისთვის უზრუნველყოს მრავალპროფილური კლინიკა.
როგორც კობა ნაყოფია ამბობს, ხელისუფლებას მიხეილ სააკაშვილის ეშინია და სწორედ ამიტომ არ გადაჰყავთ ის კერძო კლინიკაში.

"ისინი იქცევიან არაადეკვატურად. კონსილიუმის დასკვნაც, სახალხო დამცველის განცხადებაც მეტყველებს იმაზე, რომ ციხის საავადმყოფო, რომელზეც აპელირებს ხელისუფლება არ არის მრავალფუნქციური. იქ არ არის დანადგარები, რასაც საჭიროებს პრეზიდენტი სააკაშვილის სტაციონარში მოთავსების სტანდარტი, ეს დასკვნა ექიმებმაც დადეს, დადო სახალხო დამცველმაც. სხვა ალტერნატივა არ არის, ის უნდა იყოს გადაყვანილი ისეთ კლინიკაში, სადაც მიიღებს კვალიფიციურ მომსახურებას, ამას ალტერნატივა არ აქვს. პრობლემა არის იმაში, რომ ხელისუფლებას ეშინია სააკაშვილის ციხეში, საავადმყოფოში, ყველგან ეშინია, სადაც სააკაშვილი არის", - თქვა კობა ნაყოფიამ.

მიხეილ სააკაშვილის ჰოსპიტალიზაციის საკითხი დღის წესრიგში მას შემდეგ დადგა, რაც ცნობილი გახდა, რომ შიმშილობის გამო მისი ჯანმრთელობის მდგომარეობა დმძიმდა. დღეს უკვე 26-ე დღეა, რაც მესამე პრეზიდენტი საპატიმროში პროტესტის ნიშნად შიმშილობს.
ამ დრომდე უცნობია, საჭიროების შემთხვევავში, რომელ კლინიკაში გადაიყვანენ მესამე პრეზიდენტს. 21 ოქტომბერს იუსტიციის მინისტრმა თქვა, რომ თუ გადაყვანის საჭიროება დადგება, მას გლდანის მე-18 დაწესებულებაში გადაიყვანენ.
მიხეილ სააკაშვილის უფლებადამცველები ამბობენ, რომ მიხეილ სააკაშვილის გადაყვანა გლდანის ციხის საავადმყოფოში ნიშნავს, რომ სახელმწიფო მის ჰოსპიტალიზაციაზე უარს ამბობს. გლდანის საავადმყოფოში გადაყვანაზე უარს აცხადებს თავად მესამე პრეზიდენტი.