საქართველოს ყოფილი პრეზიდენტი მიხეილ სააკაშვილი Facebook-ზე გამოეხმაურა სტრატეგია აღმაშენებელის ლიდერის გიორგი ვაშაძის განცხადებას, რომელმაც თქვა, რომ "მიხეილ სააკაშვილმა არც აქამდე მისცა და არც არასდროს აძლევს გასაქანს ახალი თაობის მიდგომებს ნაციონალურ მოძრაობაში".
ვაშაძის თქმით, სააკაშვილი საკუთარი თავის იქით ვერ ხედავს და არ უნდა, რომ დაინახოს ლიდერობის შესაძლებლობა, აქედან გამომდინარე, ნაციონალურ მოძრაობას განვითარების პერსპექტივა არ აქვს.
"ეს თავის დროზე ვცადე მეც, სცადეს სხვებმაც. ვფიქრობ, ჩემს პოლიტიკურ კარიერაში ყველაზე დიდი დრო, რაც გავაცდინე, ეს იყო 2018-2020 წლები, როცა მეგონა, რომ მას შევცვლიდი. მისი გასწორება არ იქნება. ვწუხვარ, მინდოდა, რომ სხვანაირი ყოფილიყო მისი როლი, მაგრამ სამწუხარო რეალობა არის ეს", - თქვა ვაშაძემ.
ამ განცხადების საპასუხოდ სააკაშვილმა დაწერა, რომ " რა ქნას, მოშივდა საბრალოს".
"რა ქნას, მოშივდა საბრალოს, რა იყო ყველაზე ადვილი მეთოდი პარაშენკოს უკრაინაში ფულის კეთების? - სააკაშვილის ლანძღვა. იგივეა ივანიშვილის საქართველოშიც, ჯერჯერობით ივანიშვილის საქართველოში... არაუშავს, ცოტა ხანს კიდევ გაიხარონ, ერთი, ორი, სამი თვე. იშოვონ ცოტა კიდევ, თორე მერე, გაჭირდება ეგ ამბავი", - დაწერა სააკაშვილმა.
სააკაშვილის ამ პოსტს გამოეხმაურა ვაშაძე და თქვა, რომ მიშამ ძალიან კარგად იცის მას რომ არ შია.
"მე რომ არ "მშია" და მე რომ ამისთვის არ ვაკეთებ, ეს ძალიან კარგად იცის მიშამაც და ძალიან კარგად იცის მისმა ყველა თანაგუნდელმა, ძალიან კარგად იცის, რომ გიორგი ვაშაძეს ცხოვრებაში ვერავინ ფულით ვერასდროს ვერ იყიდის, მათ შორის, ვერც მიშა სააკაშვილი", - თქვა ვაშაძემ.