ოფიციალური კიევი ეძებს ფორმატს ნატო-ს ივნისის სამიტში უკრაინისა და საქართველოს ჩასართავად. ამის შესახებ დღეს ქვეყნის საგარეო საქმეთა მინისტრმა დიმიტრი კულებამ განაცხადა.
"უკრაინისთვის ნატო-ს წევრობა ისტორიულად გარდაუვალია და ეს მოხდება - სრულიად ვარ დარწმუნებული. ივნისისთვის დაგეგმილი ე.წ. მინი-სამიტი მხოლოდ მოკავშირების მონაწილეობას ითვალისწინებს. თუმცა ამჟამად პარტნიორებთან ერთად ვმუშაობთ მასში უკრაინისა და საქართველოს ჩართვისათვის შესაბამისი ფორმატის მოსაძიებლად", - განაცხადა კულებამ ტელეარხ "Украина 24"-ის ეთერში საუბრისას.
ამავდროულად, მინისტრის თქმით, იგი არ ელის, რომ ივნისის სამიტის ფარგლებში უკრაინას ე.წ. MAP-ს მიანიჭებენ.
"არ ველი, რომ ივნისში ეს გადაწყვეტილება იქნება მიღებული, თუმცა ჩვენთვის ძალზე მნიშვნელოვანია თავად ამ დისკუსიის, შესაბამისი პროცესის დაწყება, რომელიც საბოლოოდ MAP-მდე მიგვიყვანს" - დასძინა მან.