ერთიანი ნაციონალური მოძრაობის ოფისში ლიეტუვის სეიმის საგარეო კომიტეტის თავმჯდომარის ვიზიტის შემდეგ მედიასთან კომენტარი ნიკა მელიამაც გააკეთა. ენმ-ის ლიდერმა თქვა, რომ შექმნილი სიტუაციიდან ერთადერთი გამოსავალი მხოლოდ "ქართული ოცნების" უკანდახევაა, რაც ხელახალი არჩევნების დანიშვნაში უნდა გამოიხატოს. 

"ვიზიტიცაა და ვიზიტიც, ეს ვიზიტი არ იყო დაგეგმილი, მომდევნო თვეში იყო დაგეგმილი, მაგრამ ვადაზე ადრე შედგა, ფორსმაჟორული სიტუაციის გამო. აქ ის კი არ არის მთავარი, ნიკა მელიას ხელი დაედება თუ არა, მთავარი ისაა, რომ გამარჯვებულმა აღიაროს დამარცხებული", - თქვა შეხვედრის შემდეგ ნიკა მელიამ. 

ნიკა მელია საერთაშორისო საზოგადოების გამოხმაურებებსაც შეეხო და განაცხადა, რომ ხელისუფლების გადაწყვეტილებას მის საქმესთან დაკავშირებით "ვაშინგტონიდან ბრიუსელამდე ყველა გმობს". 

"ქართულ ოცნებას" აქვს ერთადერთი გამოსავალი - უკანდახევა. დროზე უნდა მიხვდნენ, რომ ნიკა მელიას ხელზე ოკუპანტის ბორკილი არ დაიდება, ეს მისია არის შეუსრულებელი. ცვლილებების გარეშე ქვეყანა ვერ ჩადგება კალაპოტში და ერთადერთი ცვლილება არის სამართლიანი რიგგარეშე არჩევნები. ერთადერთი გამოსავალი ამ შემთხვევაში არის ვადამდელი არჩევნები", - განაცხადა ნიკა მელიამ. 

შეგახსენებთ, ხელისუფლების მართული სასამართლოს გადაწყვეტილებას ნიკა მელიას დაპატიმრების შესახებ მძაფრი საერთაშორისო გამოხმაურებების გარდა, პრემიერმინისტრ გიორგი გახარიას გადადგომა მოჰყვა, რის შემდეგაც ნიკა მელიას დაპატიმრება გადაიდო.