ეროვნული ბანკის ანგარიშის მიხედვით, 2021 წლის იანვარში, იტალიიდან საქართველოში ფულადი გზავნილების ჯამი პირველად აღემატება თანხას, რომელიც ჩვენს ქვეყანაში რუსეთიდან გადმოირიცხა. აღსანიშნავია, რომ აქამდე ფულადი გზავნილების კუთხით რუსეთი ლიდერობდა. 2021 წლის იანვარში იტალიამ საქართველოს მეზობელ ქვეყანას დაახლოებით 4 მილიონი დოლარით გადაასწრო. 
ამ სტატისტიკას "ფეისბუქზე" გამოეხმაურა ეკონომისტი, ენმ-ის წარმომადგენელი რომან გოცირიძე, რომელმაც აღნიშნამ, რომ სიტუაცია საგანგაშოა. მისი თქმით, "იზრდება ევროპისა და ამერიკის ქვეყნებიდან ფულადი გზავნილები. იცლება ქვეყანა".

"იყო დრო, როდესაც მთელი ფულადი გზავნილების უდიდესი ნაწილი რუსეთზე მოდიოდა, მერე რუსეთს გადაასწრო ევროკავშირმა. მიმდინარე წლის იანვარში იტალიიდან უფრო მეტი ფული გადმოირიცხა( 27 მილიონი დოლარი), ვიდრე რუსეთიდან( 23 მილიონი). იზრდება ევროპისა და ამერიკის ქვეყნებიდან ფულადი გზავნილები. იცლება ქვეყანა", - წერს რომან გოცირიძე.

ეროვნული ბანკის ანგარიშის მიხედვით,  იტალიიდან იანვარში საქართველოში $27.3 მილიონი დოლარი შემოვიდა, რაც წინა წელთან შედარებით 29.7%-ით მეტია, რუსეთიდან კი გზავნილები 11.4%-ით, $23.2 მილიონ დოლარამდე შემცირდა.