"სალომე ზურაბიშვილი აგრძელებს პარაზიტირებას რუსეთის თემით" - კარასინმა საქართველოს პრეზიდენტის განცხადებებს "ბოდვა" უწოდა
რუსეთის საგარეო საქმეთა მინისტრის მოადგილე გრიგორი კარასინი საქართველოს პრეზიდენტის CBS-თან ინტერვიუს ეხმაურება და მას "ბოდვას" უწოდებს.
"სალომე ზურაბიშვილი აგრძელებს პარაზიტირებას რუსეთის თემით. ახლა იმ ქალბატონს, რომელიც იმპიჩმენტს ძლივს გადაურჩა, ანერვიულებს საქართველოში მცხოვრები რუსები, რომლებიც "მტრის ენაზე ლაპარაკობენ". პრეზიდენტი ამაში ხედავს რუსეთისთვის წინაპირობას გამოაცხადოს სრულფასოვანი ომი და ემხრობა რუსეთის მოქალაქეებისთვის ქვეყანაში შესვლის აკრძალვას. მსგავს საჯარო განცხადებას ვერაფერს ვუწოდებთ, გარდა ბოდვისა. დარწმუნებული ვარ, ეს თბილისსაც ესმის", - წერს კარასინი Telegram-ზე.შეგახსენებთ, სალომე ზურაბიშვილმა CBS NEWS-თან ინტერვიუში სხვა თემებთან ერთად საქართველოში შემოსულ რუსეთის მოქალაქეებზეც ისაუბრა.
"ძალიან გამაღიზიანებელია, როცა შენს ქვეყანაში გყავს ხალხი, რომელიც მტრის ენაზე საუბრობს. და რომ სჯერათ, რომ ისინი სახლში არიან", - თქვა ზურაბიშვილმა.მისი თქმით, უნდა შენარჩუნდეს ისეთი სიტუაცია, რომ მომავალში არ გვქონდეს ინციდენტები, რომლებიც რუსეთს საშუალებას მისცემს "გამოიყენოს თავისი საყვარელი დოქტრინა რუსულენოვანი მოქალაქეების დაცვის შესახებ".