"პლატფორმა 3+3 ღიაა საქართველოს თანაბარი მონაწილეობისთვის", - ამის შესახებ თეირანში, სამხრეთ კავკასიის საკითხზე 3+3 ფორმატის შეხვედრის მონაწილეებმა განაცხადეს.
"[აზერბაიჯანის, სომხეთის, ირანის, რუსეთის  და თურქეთის საგარეო საქმეთა მინისტრებმა] ასევე გაცვალეს მოსაზრებები ღაზას სექტორში არსებულ ვითარებაზე. მათ ხაზი გაუსვეს უდანაშაულო მშვიდობიანი მოსახლეობის დაბომბვის დაუყოვნებლივ შეწყვეტის აუცილებლობას“, - აღნიშნულია დოკუმენტში.
გარდა ამისა, როგორც "რადიო თავისუფლების" რუსულენოვანი ბიურო წერს, მინისტრები შეთანხმდნენ, რომ იმუშაონ "რეგიონის გრძელვადიანი მშვიდობისა და ეკონომიკური განვითარების გასაძლიერებლად", ასევე გააგრძელონ კონსულტაციები რეგიონულ პლატფორმაში მონაწილე ყველა ქვეყანას შორის "ნორმალიზაციისა და ურთიერთობების განვითარების პროცესების" მხარდასაჭერად. 

შეგახსენებთ, რომ  საქართველოს საგარეო საქმეთა სამინისტროს ინფორმაციით, ე.წ. 3+3-ის ფორმატის შეხვედრაში, რომელიც თეირანში გაიმართება, საქართველო მონაწილეობას არ მიიღებს.