დროებით ოკუპირებულ დონეცკში რუსმა ოკუპანტებმა სამხედრო ცენზურა და კომენდანტის საათი დააწესეს. შესაბამის განკარგულებას ხელი რეგიონის ე.წ. ხელმძღვანელმა, დენის პუშლინმა, მოაწერა. 
რეგიონში კომენდანტის საათი ამოქმედდება სამუშაო დღეებში 23:00 საათიდან 4:00 საათამდე. ამ დროის განმავლობაში კერძო მანქანები, ტაქსები და საზოგადოებრივი ტრანსპორტი ქუჩებში ვერ გადაადგილდება, თუ  მძღოლებს არ ექნებათ სპეციალური ნებართვა.
გარდა ამისა, იკრძალება მიტინგების, დემონსტრაციების, მარშების, პიკეტებისა და გაფიცვების მოწყობა. ე.წ. დონეცკის სახალხო რესპუბლიკის შესაბამისი უწყებებისაგან თანხმობის გარეშე, იზღუდება ნებისმიერი სახის მასობრივი შეკრების უფლებაც.
მიღებული ცვლილებების მიხედვით, 24 სექტემბრიდან სამხედრო ცენზურას ექვემდებარება მოსახლეობის სატელეფონო ზარები, შეტყობინებები და საფოსტო გზავნილები.