"რუსეთი მტერია და არა სტუმარი!" - ახალგაზრდული მოძრაობა "ჯიუტები" 19:00 საათზე, პარლამენტთან აქციას აანონსებენ. ისინი სოლიდარუბას უცხადებენ ბათუმის საპროტესტო აქციაზე დაკავებულებს და აცხადებენ, რომ რუსთაველზე საკუთარი და სამშობლოს ღირსების დასაცავად შეიკრიბებიან.

"დღეს, დილის 7 საათზე ბათუმში ისევ შემოვიდა რუსული გემი.
ქართულმა პოლიციამ, რუსული მთავრობის დავალებით, ყველაფერი გააკეთა ოკუპანტებისთვის კომფორტის შესანარჩუნებლად.
ბათუმში, რუსული მთავრობის დავალებით, 10-მდე მშვიდობიანი პროტესტის მონაწილე დააკავეს.
სოლიდარობა სამშობლოს ღირსების მცველებს! თანადგომა ბათუმს!
საღამოს შვიდ საათზე ვიკრიბებით პარლამენტთან საკუთარი და სამშობლოს ღირსების დასაცავად," - ნათქვამია განცხადებაში.

ბათუმში აქცია ამ წუთებშიც გრძელდება - საკრუიზო ლაინერი რუსი ტურისტების ნაწილმა უკვე დატოვა და ახლა სავარაუდოდ ტურისთვის ემზადებიან. პოლიციამ ისინი ადგილიდან მიკროავტობუსებით გაიყვანა. აქცია ბათუმში მთელი ღამის განმავლობაში მიმდინარეობდა. პოლიციამ აქციზე 9 ადამიანი დააკავა.
მოქალაქეები ქვეყანაში რუსი ტურისტების შემოსვლას აპროტესტებენ. აქციის მონაწილეები ამბობენ რომ რუსი ტურისტების უმეტესობას დარღვეული აქვს ოკუპაციის კანონი. გარდა ამისა, ცნობილია, რომ გემზე იმყოფებიან ომისა და პუტინის მხარდამჭერი არტისტებიც.
მოქალაქეების თქმით, ისინი მანამ არ დაიშლებიან, სანამ ლაინერი ბათუმის პორტს არ დატოვებს.