მოსკოვმა ოკუპირებულ აფხაზეთში რუსეთის 200 000-მდე მოქალაქის ჩასახლებისა და მათთვის განკუთვნილი აპარტამენტების მშენებლობის სადავო პროექტის რეალიზების მისაღწევად "ურჩი" აფხაზებისთვის დაფინანსების შეწყვეტით შანტაჟს მიჰყო ხელი.
კრემლის შესაბამისი გზავნილი დღეს მოსკოვის ზეწოლას დაქვემდებარებულმა დე ფაქტო პრეზიდენტმა ასლან ბჟანიამ გააჟღერა და მოტივად ის "მძიმე, ძვირადღირებული ომი" დაასახელა, რომელშიც რუსეთია ჩართული.
ბჟანიას თქმით, "თუ აფხაზეთი დამოუკიდებელი სახელმწიფოა, მაშინ საკუთარი ეკონომიკური დატვირთვაც უნდა გააჩნდეს".
"ყველამ ვიცით, რომ ჩვენს ძალოვან და სხვა სახელმწიფო უწყებებში დასაქმებულთა ხელფასებს წლებია, რუსეთი გვიფინანსებს. მაგრამ დღეს ჩვენი სტრატეგიული პარტნიორი ძალიან მძიმე ომშია ჩაბმული - ომში, რომლის თითოეული დღე დაახლოებით 500 მილიონი დოლარი უჯდება, რომ აღარაფერი ვთქვათ ათასობით დაღუპულსა და დაჭრილზე. დავუშვათ, რაღაც ეტაპზე რუსეთის ფედერაცია ვეღარ გაგვიწევს ფინანსურ დახმარებას... რა უნდა ვქნათ ასეთ შემთხვევაში? არავის ვაშინებ, მაგრამ თუ დამოუკიდებელი სახელმწიფო ვართ, საკუთარი ეკონომიკური დატვირთვაც უნდა გვქონდეს! და ამ კუთხით ჩვენი განვითარების მთავარი ვექტორი ტურიზმია. ამიტომაც 30-ჯერ და 40-ჯერ მეტი სასტუმრო თუ აპარტ-ოტელი უნდა აშენდეს, ამისთვის კი აუცილებლადაა მისაღები კანონი, რომელიც უცხოეთის მოქალაქეებისთვის აპარტამენტების აშენების შესაძლებლობას მოგვცემს", - განაცხადა დე ფაქტო პრეზიდენტმა.
ცნობისთვის: აფხაზეთში 200 000-მდე რუსის ჩასახლება და მათთვის მიწისა და უძრავი ქონების მიყიდვის მოქმედი საკანონმდებლო აკრძალვის გაუქმება ერთ-ერთია კრემლის მიერ სოხუმის ხელისუფლებისთვის წაყენებულ მოთხოვნებს შორის, რომელთაც "ერთიანი სოციალურ-ეკონომიკური სივრცის შექმნის მიზნით კანონმდებლობის ჰარმონიზაციის" მოსკოვიდან გამოგზავნილი 45-პუნქტიანი გეგმა მოიცავს.
ამ გეგმის პუნქტებს შორის იყო სოხუმის აეროპორტის რუსი ინვესტორისთვის 49 წლით გადაცემაც, რომელსაც რუსეთმა, აფხაზური ოპოზიციის, საზოგადოებრიობისა და საექსპერტო წრეების წინააღმდეგობის მიუხედავად, 26 ივლისს მაინც მიაღწია.
საგულისხმოა, რომ თბილისიდან ამას პროტესტით მხოლოდ პრეზიდენტი სალომე ზურაბიშვილი გამოეხმაურა. საქართველოს ხელისუფლების ყველა სხვა წარმომადგენელმა სოხუმის აეროპორტის რუსეთისთვის გადაცემის ფაქტი უბრალოდ არ შეიმჩნია.