საქართველო ახალ ფურცელს წერს ევროპის ისტორიაში, - განაცხადა ევროკომისიის ხელმძღვანელმა ურსულა ფონ დერ ლაიენმა ნიუ-იორკში მშვიდობისა და თავისუფლებისთვის მსოფლიო პრემიის დაჯილდოების ცერემონიალზე. 

"ჩვენი გაერთიანების ისტორია არის ახალგაზრდა და ძველი დემოკრატიების გაძლიერების ისტორია. ეს არის ომის შემდეგ აღორძინებული გერმანიისა და იტალიის ისტორია, ეს არის ესპანეთის, პორტუგალიისა და საბერძნეთის ისტორია დიქტატურიდან დემოკრატიამდე, ეს არის დემოკრატიული აღორძინების ისტორია რკინის ფარდის დაშვების შემდეგ. დღეს ამ ისტორიის ახალი თავი იწერება უკრაინაში, მოლდოვაში, საქართველოში. ეს არის ევროპის დაპირება - ერთიანი კონტინენტი, სადაც ყველა თანასწორია კანონის წინაშე, თავისუფლება და დემოკრატია ყველასათვის",- განაცხადა ურსულა ფონ დერ ლაიენმა. 

სიტყვით გამოსვლისას ევროკომისიის თავმჯდომარე უკრაინის ომის თემასაც შეეხო და აღნიშნა, რომ უკრაინა იბრძვის არა მხოლოდ საკუთარი, არამედ თითოეული ქვეყნის თავისუფლებისთვის და სწორედ ეს თავისუფლებაა გაეროს წესდების ფუნდამენტური პრინციპი.