საქართველოს ხელისუფლება რუსეთთან დამაკავშირებელი თბილისი-ნატახტრის გზის მოდერნიზაცია გეგმავს. 12 მილიონი ლარის ღირებულების ტენდერი უკვე გამოცხადებულია. ინფორმაციას bm.ge ავრცელებს.
როგორც სატენდერო დოკუმენტაციიდან ირკვევა, საქართველოს საავტომობილო გზების დეპარტამენტი 4-ზოლიანი მაგისტრალის მშენებლობას გეგმავს. ამოცანა რუსეთთან დამაკავშირებელ გზაზე ტვირთბრუნვის გაზრდაა.

"საქართველოს მთავრობის მიერ გატარებული წარმატებული საგარეო და საშინაო პოლიტიკის შედეგად, მნიშვნელოვნად არის გაზრდილი აღნიშნული მიმართულებით სატრანსპორტო ნაკადების ინტენსივობა...  საავტომობილო გზის თბილისი-ნატახტრის მონაკვეთს, თავისი პარამეტრების გათვალისწინებით, შეუძლია გაატაროს 40 000 ავტომანქანა დღე-ღამეში დაყვანილი ინტენსივობის შესაბამისად", - ნათქვამია სატენდერო დოკუმენტაციაში.

საერთაშორისო სანქციების ფონზე, ლარსის გზის სტრატეგიულ მნიშვნელობაზე აქტიურად საუბრობენ რუსეთში.

"ეკონომიკური ბლოკადა, რომელიც ევროპის ქვეყნებმა დაგვიყენეს, ზემო ლარსზე ახლა ირღვევა. ჩვენ ჩრდილოეთ-სამხრეთის დერეფნის გასწვრივ 15 მილიონი ტონა ტვირთის გადატანა შეგვიძლია", - თქვა რუსეთის ფედერალური საბაჟო სამსახურის ხელმძღვანელის მოვალეობიის შემსრულებელმა.

რუსეთთან დამაკავშირებელი სავაჭრო გზის მოდერნიზება კრემლის ინტერესია. ზურაბ აბაშიძისა და გრიგორი კარასინის სატელეფონო საუბარში, რომელიც რამდენიმე თვის წინ გამოქვეყნდა, კარასინი სწორედ გაზრდილი ტვირთბრუნვის გამო ახალი გზის მშენებლობას ითხოვდა.