"ქართული ოცნების" დეპუტატის, გია ვოლსკის განცხადებით, უკრაინის უმაღლესი რადას მიერ მიხეილ სააკაშვილის გათავისუფლების მოთხოვნის მიზნით შექმნილი მიმართვის პროექტის დამტკიცება "რაიმე სიახლეს თავის შინაარსში არ შეიცავს". 
როგორც ვოლსკი ამბობს, რადას მიმართვა, უკრაინის პრეზიდენტის მოწოდებები, ელჩის გაძევება, სერიოზული დემარშებია, რომლითაც უკრაინის პოლიტიკოსების ნაწილი საქართველოს უტევს.

"შესაძლოა, ვუშვებ რომ არის გარკვეული ემოცია, ზოგიერთის მხრიდან, მაგრამ პრაგმატული პოლიტიკა აქ ჭარბობს ყოველგვარ ემოციას და პირად დამოკიდებულებას. 
რადაში მიიღებ რეზოლუციას, პრეზიდენტი ილაპარაკებს ამის თაობაზე, ელჩს გააძევებს, ელჩს გაიწვევს, ეს საკმაოდ სერიოზული პოლიტიკური დემარშებია, რომლითაც უკრაინის პოლიტიკურმა გარკვეულმა ნაწილმა შემოუტია საქართველოს, ასე რომ არც რადას რეზოლუცია რაიმე სიახლეს თავის შინაარსში ან მიზანში არ შეიცავს", - ამბობს გია ვოლსკი.

შეგახსენებთ, რომ დღეს უკრაინის რადამ მხარი დაუჭირა მიმართვის პროექტს, რომლის მიხედვითაც უკრაინის პრეზიდენტს, ვოლოდიმირ ზელენსკის ოფიციალურად ევალება, რომ სალომე ზურაბიშვილს მიხეილ სააკაშვილის გათავისუფლების მოთხოვნით მიმართოს.