თურქეთის პრეზიდენტი, რეჯეფ თაიფ ერდოღანი ამბობს, რომ NATO-ში შვედეთის გაწევრიანებამდე, ევროკავშირში თურქეთის გაწევრიანების გზა უნდა გაიხსნას.

"პირველ რიგში, მოდით, გავხსნათ თურქეთის გზა ევროკავშირში, შემდეგ, შვედეთის გზა, ისევე, როგორც ჩვენ გზა გავუხსენით ფინეთს. 50 წელზე მეტია, თურქეთი ევროკავშირის კართან იცდის და NATO-ს წევრი თითქმის ყველა სახელმწიფო უკვე ევროკავშირის წევრია", - თქვა ერდოღანმა.

შეგახსენებთ, უკრაინაში რუსეთის სრულმასშტაბიანი ომის დაწყების შემდეგ, 2022 წლის თებერვალში შვედეთმა და ფინეთმა NATO-ს წევრობაზე განაცხადი შეიტანეს. ფინეთი NATO-ს წევრი 2023 წლის აპრილში გახდა, თუმცა ამ დრომდე თურქეთი ალიანსში შვედეთის გაწევრიანებას ბლოკავს. ერდოღანის თქმით, ისინი ქურთ მებრძოლებს ეფექტურად არ ეწინააღმდეგებიან, რასაც ანკარა საფრთხედ მიიჩნევს.