ომის 500 დღის განმავლობაში, რუსეთმა უკრაინაში ვერცერთ დასახულ მიზანს ვერ მიაღწია. 
ამის შესახებ ომის შემსწავლელი ინსტიტუტის (ISW) 8 ივლისის ანგარიშში ვკითხულობთ.

"500 დღის წინ რუსეთმა წამოიწყო არაპროვოცირებული დაპყრობითი ომი უკრაინის წინააღმდეგ. რუსი სამხედროები აპირებდნენ კიევის აღებას სამ დღეში, მაგრამ ვერ მიაღწიეს ვერცერთ დასახულ მიზანს უკრაინაში," - აცხადებს ISW.

ანალიტიკოსების შეფასებით, რუსეთის მრავალი შეტევა უკრაინის მტკიცე და ოსტატურმა წინააღმდეგობამ შეაჩერა, მათ შორის კიევზე. უკრაინელებმა გაათავისუფლა სუმისა და ჩერნიგოვის ოლქები. ასევე, ხარკოვის, მიკოლაივისა და ხერსონის ოლქების ნაწილი, რომლებიც რუსებს ჰქონდათ დროებით ოკუპირებული.

"უკრაინულმა ძალებმა დაიბრუნეს ინიციატივა და აწარმოებენ კონტრშეტევის ოპერაციებს ფრონტის უმეტესი ნაწილის გასწვრივ, ხოლო რუსული ძალები თითქმის მთლიანად არიან ორიენტირებული შეინარჩუნონ უკრაინის ის მიწები, რომლებსაც ჯერ კიდევ აკონტროლებენ," - ნათქვამია ანგარიშში. 

როგორც ISW ამბობს, ახლა უკრაინის წინაშე სტრატეგიულად მნიშვნელოვანი ტერიტორიების გათავისუფლების ამოცანა დგას, რომლებიც ჯერ კიდევ რუსეთის კონტროლქვეშ არიან. 8 ივლისს უკრაინის შეიარაღებულმა ძალებმა კონტრშეტევა სულ მცირე სამი მიმართულებით განახორციელეს.