საქართველო გახდა რუსეთის იზოლაციიდან დახსნის მექანიზმი - როგორც ჩანს, დიპლომატიური არხებით მუშაობამ არ გაჭრა, - ამის შესახებ ოპოზიციონერმა დეპუტატმა რომან გოცირიძემ განაცხადა, რითაც სანქციების საკითხებში ევროკავშირის წარმომადგენლის, დევის ო სალოვანის საქართველოში ვიზიტს გამოეხმაურა.
მისივე თქმით, სანქციებისთვის გვერდის ავლაში პირდაპირ და ირიბად მონაწილეობა ამორალური და დანაშაულებრივია.
"ყველამ კარგად იცის, საქართველო არის ტრანზიტული არხი, ფაქტობრივად, რუსეთის ეკონომიკის გადამრჩენი, ვინაიდან თურქეთიდან შემომავალი ტვირთები საქართველოს გავლით შედის რუსეთში. ისევე როგორც საქართველომ გაზარდა თავისი ექსპორტი შუა აზიის რესპუბლიკებში და იქიდან შემდეგ უბაჟო რეჟიმით შედის რუსეთში. საქართველო რუსეთ-უკრაინის აგრესიის შემდეგ გახდა რუსეთის იზოლაციიდან დახსნის ერთ-ერთი მექანიზმი, მათ შორის საქართველოდან შედის სანქცირებული ტვირთები, ამიტომ არის დიდი ინტერესი საქართველოს მიმართ და შემთხვევითი არ არის სახელმწიფო დეპარტამენტში ორი კვირის წინ გაკეთებული განცხადება, დასავლეთის სახელმწიფოების მაღალი თანამდებობის პირების ვიზიტები. როგორც ჩანს, დიპლომატიური არხებით მუშაობამ არ გაჭრა და ახლა უკვე ღიად მოდიან საქართველოში, რათა ეს პროცესი იყო საჯარო და მეორე მხრივ, გამოყენებული იქნას ბერკეტები, რათა რუსეთმა ვერ შეძლოს დასავლეთის სანქციების გვერდის ავლა," - განაცხადა გოცირიძემ.