28 მაისს ღამის განმავლობაში რუსეთმა უკრაინის დედაქალაქ კიევზე დრონებით მორიგი მასიური თავდასხმა განახორციელა, რის შედეგადაც სულ მცირე, ერთი ადამიანი დაიღუპა. ამის შესახებ ინფორმაციას კიევის მერი ვიტალი კლიჩკო ავრცელებს.
თავდაპირველად კლიჩკომ თქვა, რომ უკრაინის საჰაერო თავდაცვამ 20-ზე მეტი დრონის ჩამოგდება მოახერხა, მოგვიანებით კიევის სამხედრო ადმინისტრაციამ ინფორმაცია დააზუსტა და განაცხადა, რომ საჰაერო თავდაცვამ 40-ზე მეტი დრონი ჩამოაგდო.
კიევის მერმა ასევე აღნიშნა, რომ დედაქალაქის სხვადასხვა რაიონში თავდასხმის შედეგად ცეცხლი, სულ მცირე, ორ მაღალსართულიან კორპუსს გაუჩნდა. ადგილზე მობილიზებული იყვნენ სასწრაფო დახმარების თანამშრომლები.
შაბათს გვიან ღამით საჰაერო განგაში გააქტიურებული იყო უკრაინის 12 რეგიონში,  ჩრდილო-დასავლეთით ვოლინიდან სამხრეთ-აღმოსავლეთით დნეპროპეტროვსკამდე.
კიევის მერი მოქალაქეებს თავშესაფარში დარჩენისკენ მოუწოდებდა და წერდა, რომ ღამე რთული იქნებოდა.
ასევე ვრცელდება ინფორმაცია, რომ აფეთქებები იყო ქალაქ ჟიტიმორში, რომელიც კიევის დასავლეთით მდებარეობს.