ეკონომიკის მინისტრი, ლევან დავითაშვილი ამბობს, რომ რუსეთთან პირდაპირი რეისების შესრულებასთან დაკავშირებით სამმა რუსულმა კომპანიამ მიმართათ, იგივე სურვილი გამოთქვა ქართულმა ავიაკომპანიამაც. მინისტრის თქმით, დოკუმენტებს შეისწავლიან და გადაწყვეტილებას, სავარაუდოდ, ხვალ მიიღებენ.
დავითაშვილი ამბობს, რომ მოთხოვნა არის როგორც თბილისის, ასევე ქუთაისისა და ბათუმის მიმართულებებზე.

"ჩვენ მივიღეთ მომართვები გასული კვირის ბოლოს გადაწყვეტილების მიღებისთანავე რამდენიმე ავიაკომპანიისგან, მათ შორის ქართული ავიაკომპანიისგან, ჩვენ საკმაოდ ინტენსიური მუშაობა გვქონდა შიგნით ექსპერტებთან ერთად სამინისტროს და სამოქალაქო ავიაციის სააგენტოს ექსპერტებთან ერთად, იმისთვის, რომ შეგვესწავლა, თუ როგორი პრაქტიკა არსებობს რუსეთთან ფრენების კუთხით. [...] ჩვენ ვეფუძნებით მსოფლიოში ყველაზე უფრო მკაცრ მიდგომას რომელსაც ქვეყნები იყენებენ, რომლებსაც რუსეთთან ფრენები გააჩნია, ეს არის რამდენიმე კრიტერიუმის მიხედვით გადაწყვეტილება, რაც ითვალისწინებს, რომ არც სანქცირებული ბორტები, არც სანქცირებული კომპანიები არ იქნებიან დაშვებული ამ ქვეყნის ბაზარზე და საქართველოს გადაწყვეტილებაც ასეთია", - თქვა დავითაშვილმა. 

ცნობისთვის, დღეიდან, 15 მაისიდან ძალაში შევიდა პუტინის განკარგულება საქართველოსთან სავიზო რეჟიმის გაუქმების შესახებ.