დიდი ბრიტანეთის პრემიერმინისტრის ადმინისტრაციის ინფორმაციით, გაერთიანებული სამეფო უკრაინას  შორ მანძილზე მოქმედ ასობით ახალ დრონს გაუგზავნის. ადმინისტრაციამ განცხადება ორი ქვეყნის ლიდერის შეხვედრამდე გაავრცელა.

"დღეს პრემიერმინისტრი გამოაცხადებს გაერთიანებული სამეფოს შემდგომ დახმარებას, რომელიც საჰაერო თავდაცვის ასობით რაკეტებსა და უპილოტო საჰაერო სისტემებს მოიცავს, მათ შორისაა შორ დისტანციაზე თავდასხმისთვის ასობით ახალი დრონი, რომელთა მანძილი 200 კმ-ზე მეტია", - ნათქვამია ადმინისტრაციის განცხადებაში.

როგორც განცხადებაშია აღნიშნული, დახმარების ამ პაკეტს უკრაინა მომდევნო თვეებში მიიღებს.
შეგახსენებთ, უკრაინის პრეზიდენტი, ვოლოდიმირ ზელენსკი, დღეს, 15 მაისს დიდ ბრიტანეთში დაუგეგმავი ვიზიტით ჩავიდა. ის ბრიტანეთის პრემიერმინისტრს, რიში სუნაკს შეხვდება. მანამდე, 13 და 14 მაისს ზელენსკი იტალიას, გერმანიასა და საფრანგეთს ეწვია.