ყოფილი სახალხო დამცველი, ნინო ლომჯარია ამბობს, რომ ჰქონდა მოლოდინი, რომ პრეზიდენტი "მთავარი არხის" გენერალურ დირექტორს, ნიკა გვარამიას შეიწყალებდა. მისი თქმით, ამ მოლოდინს აჩენდა ის, რომ ზურაბიშვილი სტრასბურგში მიემგზავრებოდა, სადაც "ცარიელი ხელებით" ვერ ჩავიდოდა. ამის შესახებ მან გადაცემა "დღის სტუმარში" ისაუბრა.

"მე მქონდა მოლოდინი, რომ შეიწყალებდა, მე ნიკას შეწყალების პროცესს არ ვუყურებ პოლიტიკურ ჭრილში ან როგორც პოლიტიკოსები უყურებენ ამ პროცესს, მე ვუყურებ, როგორც ადამიანის უფლებადამცველი და ამ სტანდარტით, ნიკა საერთოდ არ უნდა იჯდეს ციხეში, იმიტომ, რომ ყველა ადამიანის უფლებადამცველი ორგანიზაცია, რომელიც საქართველოში მუშაობს ან საქართველოზე მუშაობს, წერდა და დაწერილი აქვს, რომ ნიკას ქმედებებში დანაშაულის ნიშნები არ იყო და მას პატიმრობა მიესაჯა ისეთი ქმედებების გამო რომელიც სისხლის სამართლის განსჯად საკითხს საერთოდ არ წარმოადგენს. [...] 
მაინც მქონდა მოლოდინები, რომ ნიკას შეიწყალებდა, იმიტომ, რომ პრეზიდენტი მიემგზავრებოდა სტრასბურგში საქართველოს ევროინტეგრაციაზე სასაუბროდ და პრეზიდენტს რაღაც იქ უნდა ჩაეტანა. მისი განცხადებები მოსმენილი გვაქვს, მაგრამ გარდა განცხადებებისა მაღალ თანამდებობის პირებს ყველას აქვს თავისი ვალდებულებები, თავისი მანდატი ამ პროცესში, ცარიელი ხელებით ისე ვერ ჩავიდოდა", - თქვა ლომჯარიამ. 

მისი აზრით, ევროპარლამენტარები ჰკითხავდნენ ზურაბიშვილს, რას აკეთებს თავად ის იმისთვის, რომ 12 რეკომენდაცია შესრულდეს და ამაში იგულისხმება პოლიტიკური პატიმრების არარსებობა და მედია მფლობელების მიმართ დევნის შეწყვეტა.