რუსეთის საგარეო დაზვერვის სამსახურის დირექტორი, სერგეი ნარიშკინი ამტკიცებს, რომ აშშ, ევროკავშირი და დიდი ბრიტანეთი ცდილობენ საქართველოს დარწმუნებას "მეორე ფრონტის" გახსნაში. 
ამის შესახებ მან ბელარუსის პრეზიდენტ ალექსანდრე ლუკაშენკოსთან შეხვედრაზე განაცხადა.

„ჩვენ ვხედავთ ვაშინგტონის, ბრიუსელის, ლონდონის დაჟინებულ მცდელობებს, დაარწმუნონ საქართველოს ხელმძღვანელობა ე.წ. მეორე ფრონტის გახსნის აუცილებლობაში. ისინი ხედავენ, რომ ბრძოლის ველზე სიტუაცია უკრაინის სასარგებლოდ არ არის და აიძულებენ საქართველოს შევიდეს კონფლიქტში რუსეთის ფედერაციასთან“, - განაცხადა ნარიშკინმა.

მისი თქმით, დასავლეთის ქვეყნები ცდილობენ დაარწმუნონ თბილისი, რომ ახლა კარგი დროა აფხაზეთსა და "სამხრეთ ოსეთზე" კონტროლის დასაბრუნებლად.
ნარიშკინი მინსკში იმყოფება, სადაც ის ლუკაშენკოს შეხვდა.