სალომე ზურაბიშვილს რაღაც, პატარა ავტონომიური მოძრაობები ადრეც ჰქონდა, მაგრამ დღეიდან მან ფაქტობრივად დაგმო თავისი წარსული, - ასე შეაფასა დამოუკიდებელმა დეპუტატმა, რომან გოცირიძემ „პალიტრანიუსის“ გადაცემა „360 გრადუსში“ პარლამენტში საქართველოს პრეზიდენტის, სალომე ზურაბიშვილის მიერ ყოველწლიური მოხსენებისას გაკეთებული განცხადებები.
რომან გოცირიძის შეფასებით, დამთავრდა სალომე ზურაბიშვილის ის ეტაპი, როდესაც ის იყო „ქართული ოცნების“ პრეზიდენტი.
„დღევანდელი დღიდან სალომე ზურაბიშვილმა მოიჭრა ყველა კავშირი „ქართულ ოცნებასთან“. ამით დამთავრდა მისი ეტაპი, როდესაც იყო „ქართული ოცნების“ პრეზიდენტი, მისი ინტერესების გამხმოვანებელი. მახსოვს, როდესაც საუბარი იყო ბიძინა ივანიშვილის ოლიგარქად გამოცხადების შესახებ ევროკავშირის რეზოლუციაში, სალომე ზურაბიშვილი ფაქტობრივად გადაეფარა მაშინ ივანიშვილს, ირიბად გააკრიტიკა ევროკავშირი, რომ ივანიშვილს ასე მოიხსენიებდნენ და არ არის გამორიცხული, რომ გარკვეულწილად ლობირებდა მის ინტერესებს, მაგრამ დღეს აბსოლუტურად სხვა ადამიანია. სალომე ზურაბიშვილმა ნათლად დაინახა ის, რასაც ხედავდა მთელი ქვეყანა ამ ბოლო წლების განმავლობაში. სალომე ზურაბიშვილმა განიცხადა მეტამორფოზი, ხოლო „ქართულმა ოცნებამ“ განიცადა ფერისცვალება - მოხდა მისი აბსოლუტური ტრანსფორმაცია ურჩხულად“, - განაცხადა რომან გოცირიძემ.
ამასთან, რომან გოცირიძის მტკიცებით, ის დარწმუნებულია, რომ სალომე ზურაბიშვილი „მთავარი არხის“ დამფუძნებელ ნიკა გვარამიას შეიწყალებს.
„ერთ დღეში, რა თქმა უნდა, ყველაფერს ვერ გააკეთებს, მაგრამ ერთ რამეში ვარ დარწმუნებული, როგორც 2x2=4, ის ნიკა გვარამიას შეიწყალებს, ოღონდ მე ახლა მასაც მივმართავ, მოდი, რა, პილპილ მოყრილი არ გამოგივიდეს, თუ რაღაცას აკეთებ, ბოლოს არ გაამწარო, გააკეთე დროზე“, - განაცხადა რომან გოცირიძემ.