რეპრესიების ღამეს დაკავებული პირების სასამართლო პროცესი გრძელდება.
უკვე ჩანიშნულია საბა მეურმიშვილის პროცესიც, რომელიც ერთ-ერთია მათ შორის, ვინც ქუჩაში რუსული კანონის წინააღმდეგ გავიდა და ხელბორკილები სამართალდამცველებისადმი დაუმორჩილებლობის მოტივით დაადეს.
სავარაუდოდ, სხვა დაკავებულების სასამართლო პროცესიც დღეს არის ჩანიშნული. 
მათი ადვოკატი ლაშა ტყეშელაძე ამბობს, რომ მოსამართლეს არ აქვს იმის საფუძველი, რომ დღეს ან 22 მარტს რომელიმე დაკავებული პატიმრობაში დატოვოს. 

ველოდებით იზოლატორში მყოფი პირების გათავისუფლებას, დღეს შინაგან საქმეთა სამინისტროს აქვს ორი გადაწყვეტილების უფლება. ერთი ხელწერილით გამოუშვას, რაც შეიძლება მალე და მეორე- გააგზავნოს საქმე სასამართლოში და სასამართლომ უმოკლეს ვადებში ჩანიშნოს აღნიშნული პროცესი. ერთი ძალიან მნიშვნელოვანი კითხვა უნდა დავუსვა პოლიციის თანამშრომელს, რომელმაც საქართველოს მოაქალაქეს სიტყვა მონალიზას გამო დააკავა. ძალიან მაინტერესებს რატომ დააკავა მან სამოქალაქო აქტივისტი სიტყვა ,,მონა ლიზას" გამო, რა ან ვინ ჰგონია ,,მონა ლიზა",- ამბობს ლაშა ტყეშელაძე.

როგორც ერთ-ერთი აქტივისტი, იმედა კლდიაშვილი აცხადებს, ის ახალგაზრდებს გადაეფარა და ეს გახდა მისი დაკავების მიზეზი.

არგუმენტებით, რომლებიც მოსამართლესთან წარმოდგენილი ჰქონდა პატრულს,  იყო, რომ მე ხელი შევუშალე ახალგაზრდების დაკავებაში პატრულის თანამშრომლებს და ეს მართლაც დავადასტურე, ეს მართლაც ასე იყო, რადგან როდესაც ადამიანებს აკავებდნენ, მივედი პოლიციასთან, ვკითხე რატომ აკავებდნენ და გადავეფარე ახალგაზრდებს. ეს ჩამითვალეს ხელშეშლად და დამაპატიმრეს. მოსამართლე ფილიშვილმა ჩათვალა, მიზანშეწონილად, რომ დავეჯარიმებინეთ, თუმცა იქვე დააყოლა, რომ გამაპროტესტებელი ადამიანის დაჭერა, სიტყვა მონის ძახილის გამო ტროტუარიდან, არ შეიძლება. ჩემი აზრით, ეს ყველაფერი ემსახურება საპროტესტო მუხტის დაგდებას," - ამბობს იმედა კლდიაშვილი.

ცნობისთვის, ე.წ. უცხოური გავლენის აგენტების შესახებ კანონპროექტების წინააღმდეგ გამართულ აქციაზე 36 მომიტინგე დააკავეს.