პარლამენტის თავმჯდომარე, შალვა პაპუაშვილი ევროპარლამენტის მიერ მესამე პრეზიდენტთან დაკავშირებით მიღებულ რეზოლუციაზე ამბობს, რომ დეზინფორმაციის წყაროა და თავდასხმაა საქართველოზე. მისი თქმით, პოლიტიკოსების გარკვეული ჯგუფი, რომელიც მიხეილ სააკაშვილის მეგობარია ცდილობს ხელი შეუშალოს საქართველოს ევროპულ მომავალს.

"თავისთავად, სამწუხაროდ ევროპარლამენტის რეზოლუციები იქცა დეზინფორმაციის წყაროდ და ასევე თავდასხმად საქართველოზე, წინა რეზოლუციებზეც გვქონდა ჩვენ, რომ იქაც რა თქმა უნდა, ბევრი შეცდომა უზუსტობა და დეზინფორმაცია იყო, ამ შემთხვევაშიც, პირველივე წინადადება ამ რეზოლუციის ისე წარმოაჩენს სიტუაციას, თითქოს მიხეილ სააკაშვილ იყო დევნილი საკუთარი სამშობლოდან, არადა ჩვენ ხომ ვიცით რა არის ჩვენი უახლესი ისტორია, უახლესი ისტორია არის რომ მიხეილ სააკაშვილი გაიქცა საქართველოდან, ჩვენ ვიცით, რომ ქართულმა და არა მხოლოდ ქართულმა მართლმსაჯულებამ ის ბრალდებულად ცნო დანაშაულებში", - თქვა პაპუაშვილმა. 

მისი განცხადებით, მთელმა მსოფლიომ ნახა კადრები "როგორ იმყოფებოდა მიხეილ სააკაშვილი რძის პროდუქტების კონტეინერში და შემოიპარა საქართველოში". პაპუაშვილი ამბობს, რომ გარკვეული პოლიტიკური ჯგუფები არიან მიხეილ სააკაშვილის მეგობრები და არა საქართველოს და "მზად არიან საქართველოს მათ შორის ევროპული მომავალი გადააყოლონ ერთ ადამიანს".