"ეს ხომ CNN-ია და არა TV პირველი ან მთავარი არხი"- ამის შესახებ "ქართული ოცნების" თავმჯდომარე ირაკლი კობახიძე საუბრობს და გავლენიან ამერიკულ მედიასაშუალებას, CNN-ს "ფეიკ"-ინფორმაციის გავრცელებაში ადანაშაულებს. კობახიძემ TV იმედის ეთერში სტატისტიკაც მოიყვანა და თქვა, რომ საქართველოდან რუსეთის მიმართულებით ექსპორტის მატება არ შეინიშნება - მისი თქმით, ამით დასტურდება, რომ "CNN-ზე გაჟღერდა მარტივი ტყუილი".
"ოცნების" თავმჯდომარე ამით CNN-ის ჟურნალისტის მიერ ურსულა ფონ დერ ლეიენისთვის რუსეთის წინააღმდეგ დაწესებული სანქციების ეფექტურობასთან დაკავშირებით დასმულ კითხვას გამოეხმაურა, რა დროსაც, ჟურნალისტმა თქვა, რომ ვრცელდება ინფორმაცია საქართველოს გავლით მათ გვერდის არიდებაზე. 

არის გლობალური ომის პარტია, რომელსაც აქვს ინტერესი რომ საქართველო ჩართოს უკრაინაში მიმდინარე ომში. და ისინი ცდილობენ სხვადასხვა ფორმით და სხვადასხვა მეთოდით. ერთ-ერთი ბოლო შემთხვევა იყო გუშინ, თუ არ ვცდები, იყო CNN-ზე ურსულა ფონ დერ ლეიენის, ევროკომისიის ხელმძღვანელის ჩართვა, სადაც CNN-ის ჟურნალისტი "ფეიკ"-სტატიაზე დაყრდნობით უსვამს კითხვას ურსულა ფონ დერ ლეიენს, რასაც საფუძვლად უდევს თითქოს ფაქტი იმასთან დაკავშირებით, რომ საქართველო არის ერთ-ერთი მთავარი ხელშემწყობი იმის, რომ რუსეთში შეედინება სანქცირებული პროდუქტები.
ეს ხომ CNN-ია და არა TV პირველი ან მთავარი არხი, ნაცმოძრაობის ჯიბის ტელევიზიები, ხო. როდესაც CNN-ზე ასეთი მასშტაბის ტყუილი ჟღერდება, ეს მიუთითებს იმაზე, რომ არის რაღაც სერიოზული ძალა, რომელსაც აქვს ინტერესი, რომ საქართველოს შეუქმნას ხელოვნურად პრობლემები. მიზანი ამ ხელოვნურად პრობლემების შექმნის შეიძლება იყოს ერთი - ესკალაცია და საბოლოო ჯამში ამ ესკალაციის საბოლოო შედეგი უნდა იყოს რა თქმა უნდა მეორე ფრონტი... 
...გუშინ CNN-ზე გაჟღერდა მარტივი ტყუილი, - ამბობს კობახიძე.