მიხეილ სააკაშვილის დედა, გიული ალასანია პარლამენტის თავმჯდომარის, შალვა პაპუაშვილის განცხადებას გამოეხმაურა, რომელმაც პრეზიდენტის მხრიდან მიხეილ სააკაშვილის შეწყალებაზე ისაუბრა და თქვა, რომ მას შეწყალების მოლოდინი არ აქვს.
გიული ალასანიას შეფასებით, მმართველი პარტიის წარმომადგენლების მხრიდან მსგავსი განცხადებები პრეზიდენტზე ზეწოლის მცდელობაა.

"გაფრთხილებაც არის ეს პრეზიდენტისთვის? თუ როგორ არის, ეს შეთანხმებულია? ამას ხომ ვხედავთ, აფრთხილებენ, ემუქრებიან, ეს არის. გადაწყვეტილებას შეაცვლევინებს თუ დარწმუნდებიან, რომ რუსეთი დამარცხებულია. როგორც ჩანს, ვერ დარწმუნდნენ ამაში. ფაქტია, რასაც ხედავს მთელი მსოფლიო და ყველა დარწმუნებულია, რომ რუსეთი დამარცხებულია და უკრაინა ამ შემთხვევაში დამარცხებული. უკრაინაში კი არ არის მხოლოდ საქმე, უკრაინა ამ შემთხვევაში ნახევარი სამყაროსთვის იბრძვის. ველოდებით ხვალინდელ სასამართლო პროცესს, ვნახოთ როგორ განვითარდება.", - თქვა გიული ალასანიამ.

რაც შეეხება მიხეილ სააკაშვილის ჯანმრთელობის მდგომარეობას, გიული ალასანიას ინფორმაციით, ის კვლავ მძიმეა. ალასანია ვარაუდობს, რომ მიხეილ სააკაშვილი ხვალინდელ პროცესზე დასწრებას ვერც ფიზიკურად და ვერც დისტანციურად შეძლებს.
ხვალ, 9 იანვარს, თბილისის საქალაქო სასამართლოში მიხეილ სააკაშვილის სასჯელისგან გათავისუფლების ან სასჯელის გადავადების საქმეს განიხილავენ.