"ნაციონალური მოძრაობის" თავმჯდომარე ნიკა მელია წალენჯიხის მოსახლეობას შეხვდა. საუბარი, ძირითადად მიხეილ სააკაშვილის სიცოცხლის გადარჩენასა და მისი ციხიდან გამოხსნის გზებს ეხებოდა.

"ძალიან მნიშვნელოვანი შეხვედრა იყო წალენჯიხაში ჩვენს თანამებრძოლებთან, პარტიის ამომრჩევლებთან, ადამიანებთან, ვისაც სურს ამ ქვეყნის გამარჯვება, ევროპული მომავალი, სიკეთის გამარჯვება და ამ ქვეყანაში შვილების აღზრდა, ბედნიერი ცხოვრება, პოლიტიკური პატიმრობის დასრულება...  მიხეილ სააკაშვილის პატიმრობა ნიშნავს, რომ საქართველოს ევროპული მომავლისკენ მიმავალი გზა განგებ ჩახერგილია ბიძინა ივანიშვილის ხელისუფლების მიერ. ამ საკითხზე ძალიან ბევრი ვისაუბრებთ, როგორ გვესახება საუკეთესო გამოსავალი ამ უმძიმესი ჩიხიდან. შევთანხმდით იმაზე, რაც ამ ქვეყანასა და მის მომავალს წაადგება"- თქვა ნიკა მელიამ. 

მოსახლეობის აზრით, ერთადერთი გამოსავალი ერთიანობა და საერთაშორისო საზოგადოების ზეწოლაა. შეხვედრები საქართველოს სხვადასხვა კუთხეშიც გაგრძელდება.