მოძრაობა "ხალხის ძალის" წევრის, გურამ მაჭარაშვილის განცხადებით, ასრულებენ მუშაობას კანონპროექტზე, რომელიც მედიაში სიცრუის გავრცელების რეგლამენტაციას ითვალისწინებს.
მისი მტკიცებით, კანონპროექტი ეფუძნება ერთ-ერთი მოწინავე ევროპული დემოკრატიული სახელმწიფოს კანონმდებლობას, თუმცა რომელს, არ დაუკონკრეტებია.

"დღეს მთელი რიგი ენჯეოები და მედიასაშუალებები მნიშვნელოვან როლს ასრულებენ საქართველოში პოლიტიკური პროცესების რადიკალიზაციასა და პოლარიზაციაში. აქედან გამომდინარე, მიგვაჩნია, რომ ჩვენ მიერ მომზადებული ორივე კანონპროექტის მიღება მნიშვნელოვან წვლილს შეიტანს დეპოლარიზაციაში, რაც საქართველოს მშვიდობიანი და სტაბილური განვითარების აუცილებელი პირობაა", - თქვა მაჭარაშვილმა.

მაჭარაშვილმა თქვა, რომ "ხალხის ძალას" ექნება პრინციპული პოზიცია ორივე პაკეტის მიღებასთან დაკავშირებით. მისი თქმით, ინიცირებისთანავე დაიწყებენ კონსულტაციებს "ოცნებასთან", ასევე "უცხოური გავლენისგან თავისუფალ და არარადიკალურ საპარლამენტო პოლიტიკურ ჯგუფთან". 
ცნობისთვის, "ხალხის ძალა" მმართველი პარტიიდან გასულმა დეპუტატებმა დააფუძნეს. ისინი დეზინფორმაციულ, ანტიდასავლურ და ანტიამერიკულ განცხადებებს აკეთებენ, მათ შორის ავრცელებენ რიტორიკას "ომში ჩართვაზე" და "მეორე ფრონტზე", თავს ესხმიან ელჩს, კელი დეგნანს.