უკრაინის პრეზიდენტი ვოლოდიმირ ზელენსკი თეთრ სახლში ვიზიტის შემდეგ აშშ-ის კონგრესში მივიდა, სადაც მას ფეხზე წამოდგომითა და ხანგრძლივი ტაშით შეხვდნენ. მის სიტყვით გამოსვლას ესწრებოდა ვიცე-პრეზიდენტი კამალა ჰარისიც.
ზელენსკიმ კონგრესს საჩუქრად გადასცა ბახმუტიდან ჩატანილი უკრაინის დროშა უკრაინელი ჯარისკაცების ხელმოწერებით. წარმომადგენელთა პალატის სპიკერმა, ნენსი პელოსიმ კი უკრაინის პრეზიდენტს აჩუქა აშშ-ის დროშა, რომელიც მისი აშშ-ში ვიზიტის დღეს კაპიტოლიუმის შენობის თავზე ფრიალებდა.
გთავაზობთ CNN-ის მიერ გამორჩეულ 5 ციტატას ზელენსკის გამოსვლიდან:

1. ზელენსკიმ მოუწოდა აშშ-ს ფინანსური მხარდაჭერის გაგრძელებისკენ და თქვა: "თქვენი ფული არ არის ქველმოქმედება. ეს არის ინვესტიცია გლობალურ უსაფრთხოებასა და დემოკრატიაში, რომელსაც ჩვენ პასუხისმგებლობით ვატარებთ."
2. ზელენსკიმ მოუწოდა კონგრესის წევრებს, გააძლიერონ სანქციები რუსეთის წინააღმდეგ და "ტერორისტებს აგრესიაზე პასუხისმგებლობა დაეკისროს". მან აღნიშნა, რომ აშშ-ს პრეზიდენტმა ჯო ბაიდენმა მხარი დაუჭირა მის 10-პუნქტიან სამშვიდობო გეგმას, თუმცა დასძინა, რომ კონგრესის თითოეულ წევრს შეუძლია დაეხმაროს უკრანას ამის განხორციელებაში.
3. რუსები "ყველაფერს იყენებენ" უკრაინის ქალაქების წინააღმდეგ, როგორიცაა ბახმუტი, მაგრამ უკრაინა "ინარჩუნებს თავის ხაზს და არასოდეს დანებდება", - თქვა ზელენკსიმ მხურვალე აპლოდისმენტების ფონზე. "შარშან ბახმუტში 70 000 ადამიანი ცხოვრობდა... ახლა მხოლოდ რამდენიმე მშვიდობიანი მოქალაქეა დარჩენილი. ამ მიწის ყოველი სანტიმეტრი სისხლით არის გაჟღენთილი... დონბასი რამდენჯერმე გადავიდა ხელიდან ხელში სასტიკი ბრძოლით და ხელჩართული ბრძოლითაც კი, მაგრამ უკრაინული დონბასი დგას".
4. ზელენსკიმ თქვა, რომ უკრაინელები შობას წელს აღნიშნავენ, მიუხედავად ომის სისასტიკისა და კონგრესს უთხრა: "ელექტროენერგია რომც არ იყოს, ჩვენი რწმენის შუქი არ ჩაქრება."
5. ზელენსკიმ თავისი გამოსვლა დაასრულა იმით, რომ უკრაინა მიაღწევს "აბსოლუტურ გამარჯვებას" და კიდევ ერთხელ გაიმეორა მისი მკვეთრი მესიჯი -  "უკრაინა ცოცხალია".