დასავლეთის სანქციები უკვე ხელს უშლის რუსული არმიის მარაგების შევსებას, თუმცა აშშ მათი კიდევ უფრო გაფართოებისთვის ემზადება, რათა კიდევ უფრო გაართულოს რუსული საბრძოლო მასალის წარმოება - The New York Times-ის ცნობით,  გასაიდუმლოებული სამთავრობო ანგარიშის მიხედვით, შეერთებულმა შტატებმა დაადგინა, რომ დასავლეთის სანქციები უკვე აფერხებს რუსეთის შესაძლებლობებს შეავსოს სამხედრო მარაგები. 
აშშ-ს მონაცემებით, თებერვლიდან მოყოლებული დღემდე, რუსეთმა უკრაინაში 6 ათასი ერთეული აღჭურვილობა დაკარგა და ის იმაზე სწრაფად ხარჯავს  საბრძოლო მასალას, ვიდრე ცვლის ახლით.
აშშ-ში ასევე საუბრობენ რუსეთისთვის ისეთი კრიტიკული ნაწილების ნაკლებობაზე, როგორიცაა დიზელის ძრავები, ვერტმფრენების, თვითმფრინავებისა და ტანკების ძრავის ნაწილები. ექსპორტის კონტროლის გამო, რომელიც ზღუდავს სამხედრო ტექნიკისთვის საჭირო მასალების მიყიდვას, რუსეთში დაზარალდა მაღალი სიზუსტის იარაღის წარმოებაც.
გამოცემა წყაროებზე დაყრდნობით წერს, რომ ახლა საერთაშორისო კოალიციის მთავარი ამოცანაა გზების მოძიება, იმისთვის, რომ რუსეთს მეტი საბრძოლო მასალის წარმოება არ შეეძლოს.