რუსულ მედიაში გავრცელებული ინფორმაციის გარეშეც ბევრი სპეკულაციაა - დეგნანი FSB-ს ბრალდებებზე
აშშ-ის ელჩი კელი დეგნანი აცხადებს, რომ ყირიმის ხიდთან დაკავშირებით „ბევრი სპეკულაციაა“. ელჩის თქმით, აშშ-ი საქართველოს საბაჟოსთან, საქართველოს სასაზღვრო პოლიციასთან და სანაპირო დაცვასთან ათწლეულებია მუშაობს, რათა დაიცვან საკუთარი საზღვრები და შეაჩერონ აგრესია.
“ამ რუსულ მედიაში გავრცელებული ინფორმაციის გარეშეც ბევრი სპეკულაციაა, თუმცა ზუსტი ინფორმაცია ამასთან დაკავშირებით, რა თქმა უნდა, არავის აქვს. ჩვენ ვმუშაობთ საქართველოს საბაჟოსთან, საქართველოს სასაზღვრო პოლიციასთან და სანაპირო დაცვასთან უკვე ათწლეულებია და უზრუნველვყოფთ მათ ყველანაირი შესაძლებლობით, აღჭურვილობით, სწავლებებით და ტრენინგით, რომ დაიცვან საკუთარი საზღვრები, შეაჩერონ აგრესია და ამ თანამშრომლობას გავაგრძელებთ”, - ამბობს დეგნანი.შეგახსენებთ, კრემლი ამტკიცებს რომ ყირიმის ხიდზე აფეთქებაში ქართველებიც მონაწილეობდნენ. რუსეთის უშიშროების ფედერალური სამსახურის ინფორმაციით 8 ოქტომბერს მომხდარი ტერაქტის საქმეზე დაკავებულია 8 პირი. გამოვლენილია ტერაქტის მომზადების 12 თანამზრახველი, მათგან 2 საქართველოს მოქალაქე.