„პუტინს სურს, რომ უკრაინელები შეაშინოს, მაგრამ ისეთი შიში, როგორც 24 თებერვლის შემდეგ, ომის პირველ სამ დღეში გვქონდა, ჩვენ აღარასოდეს გვექნება“. ასე გამოეხმაურა ფეისბუკში უკრაინის პრეზიდენტის ოფისის მრჩეველი ალექსეი არესტოვიჩი უკრაინაზე 10 ოქტომბერს განხორციელებულ მასირებულ სარაკეტო იერიშს. 
„რაკეტების მარაგი ულევი არ არის, ის აუცილებლად ამოიწურება. ეს შეიძლება დღეს დასრულდეს, შეიძლება ხვალ, არ ვიცით, მაგრამ ეს არაფერს შეცვლის. უკრაინა, როგორც იბრძოდა, ისე გააგრძელებს ბრძოლას. შეიცვლება მხოლოდ იმათი დამოკიდებულება პუტინის მიმართ, რომელიც ჯერ კიდევ მასთან მოლაპარაკებას შესაძლებლად თვლის. დასავლეთი კი გარანტირებულად გაზრდის უკრაინისთვის იარაღის მიწოდებას. ასე რომ, არ შეგეშინდეთ, ჩვენ ყველაფერს გავაკეთებთ მოსახლეობის დასაცავად და მტრის გასანადგურებლად“, - განაცხადა არესტოვიჩმა.
მისი თქმით, რუსული ძალები უკრაინის ენერგეტიკულ ინფრასტრუქტურას უტევენ და მისი გაყინვა სურთ, რის შესახებ რუსმა პროპაგანდისტებმა არაერთხელ განაცხადეს. ამასთანავე, ზელენსკის ოფისის მრჩეველი ამბობს, რომ ეს მცდელობაც წარუმატებელი იქნება.