ევროკავშირმა სრულად შეაჩერა რუსეთთან გამარტივებული სავიზო რეჟიმი. ევროპულმა საბჭომ გადაწყვეტილება დღეს, 9 სექტემბერს მიიღო. მანამდე, 31 აგვისტოს, შესაბამის პოლიტიკურ შეთანხმებას მიაღწიეს წევრი სახელმწიფოების საგარეო საქმეთა მინისტრებმა.
ევროკავშირის მოქმედი თავმჯდომარე ქვეყნის, ჩეხეთის შინაგან საქმეთა მინისტრ ვიტ რაკუშანის განცხადებით, გამარტივებული სავიზო რეჟიმი პრივილეგიაა მოქალაქეებისთვის საიმედო პარტნიორ ქვეყნებში, რომლებთანაც ევროკავშირს საერთო ფასეულობები აქვს, რუსეთმა კი, უკრაინაში არაპროვოცირებული, აგრესიული ომით და სამოქალაქო მოსახლეობაზე თავდასხმით დაარღვია ეს ნდობა და ხელყოფს საერთაშორისო თანამეგობრობის ძირითად ფასეულობებს.
რაკუშანის თანახმად, ევროპული საბჭოს დღევანდელი გადაწყვეტილება რუსეთის ქმედებების პირდაპირი შედეგია და კიდევ ერთხელ ადასტურებს უკრაინისა და მისი ხალხისადმი ევროკავშირის მტკიცე მხარდაჭერას. რუსეთის მოქალაქეები გამარტივებული სავიზო რეჟიმი ვეღარ ისარგებლებენ 2022 წლის 12 სექტემბრიდან.