რატომ გადაადგილდება სამხედრო ტექნიკა ვალე-თბილისის გზაზე - თავდაცვის სამინისტრო განცხადებას ავრცელებს და წერს, რომ საავტომობილო გზაზე სამხედრო ტექნიკით დატვირთული ტრაილერების გადაადგილება მრავალეროვნული სამხედრო სწავლების „ღირსეული პარტნიორი 2022“ უკავშირდება.
უწყების ცნობით, სწავლებაში მონაწილეობის მიზნით სამხედრო ტექნიკის დისლოკაციის საბოლოო ადგილად ვაზიანის სამხედრო ბაზა და ვაზიანის პოლიგონია განსაზღვრული.
"საქართველოს ტერიტორიაზე გადაადგილებისას კონვოის ესკორტირებას სამხედრო პოლიციის ეკიპაჟი უზრუნველყოფს... ამერიკული სამხედრო ტექნიკით დატვირთული ტრაილერები საქართველოში გერმანიიდან ხუთი ქვეყნის - ავსტრიის, უნგრეთის, რუმინეთის, ბულგარეთისა და თურქეთის გავლით შემოდის" - წერს სამინისტრო.