"საქართველოს მთავრობა ახლა არ იმყოფება იმ მდგომარეობაში, რომ ევროკავშირს პირობები წაუყენოს", - ასე ეხმიანება "რადიო თავისუფლების" ბრიუსელის ბიუროს ჟურნალისტი, რიკარდ ჟოზვიაკი "ქართული ოცნების" თავმჯდომარის, ირაკლი კობახიძის განცხადებას.
მისი შეფასებით, როდესაც ქვეყანას აქვს ევროკავშირის წევრობის სურვილი, მას აქვს შესაძლებლობა იკითხოს, რა სახის რეფორმები უნდა გაატაროს ქვეყანაში, რათა გახდეს ევროკავშირის სრულფასოვანი წევრი. ამ პროცესში კი მომთხოვნი არის ევროკავშირი და არა თბილისი.

"საქართველოს მთავრობა ახლა არ იმყოფება იმ პოზიციაში, რომ ევროკავშირს მოსთხოვოს რაიმე და წაუყენოს პირობები. ბრიუსელმა საქართველოს მისცა სამოქმედო რუკა და საქართველოსგან აქვს მოლოდინი, რომ ამას შეასრულებს, იმისთვის, რომ მიიღოს კანდიდატის სტატუსი. როდესაც ქვეყანას აქვს ევროკავშირის წევრობის სურვილი, მას აქვს შესაძლებლობა და უფლება იკითხოს, თუ რა სახის რეფორმები უნდა გაატაროს ქვეყანაში, რათა გახდეს ევროკავშირის სრულფასოვანი წევრი. ამ პროცესში მომთხოვნი არის ევროკავშირი და არა თბილისი. თუ მოთხოვნები მოდის თბილისიდან, ევროკავშირი ამას იგნორს გაუკეთებს. ეს დამოკიდებულება კიდევ უფრო ნათლად აჩვენებს, როგორი მიდგომა აქვს საქართველოს ხელისუფლებას აღებული ვალდებულებების შესასრულებლად", - ამბობს ჟოზვიაკი.

შეგახსენებთ, გუშინ "ქართული ოცნების" ოფისში გამართული შეხვედრის შემდეგ, რომელსაც პრემიერი ირაკლი ღარიბაშვილიც ესწრებოდა, პარტიის თავჯდომარე ირაკლი კობახიძემ ბრიფინგი გამართა და თქვა, რომ "მას შემდეგ, რაც დეკემბერში ქვეყანა ევროკავშირის კანდიდატის სტატუსს მიიღებს", პარლამენტი კონსტიტუციურ კანონს დაამტკიცებს, რომლის თანახმადაც 2024 წლის და შემდეგი არჩევნები სრულად პროპორციული სისტემით, 2%-იანი ბარიერით ჩატარდება. კობახიძემ დასძინა, რომ ამ საკითხზე ვალდებულება არ იმოქმედებს, თუ საქართველო სტატუსს ვერ მიიღებს.