რუსეთის საგარეო საქმეთა სამინისტრო ისრაელისგან სირიაში განხორციელებული საჰაერო იერიშების უპირობოდ შეწყვეტას მოითხოვს.
"2 ივლისს სირიის არაბულ რესპუბლიკაში, ტარტუსის პროვინციაში მდებარე ობიექტების მიმართულებით ისრაელის საბრძოლო თვითმფრინავებმა რამდენიმე რეაქტიული საბრძოლო მასალა ისროლეს. შემოსული შეტყობინებების მიხედვით, საჰაერო თავდასხმის შედეგად დაიჭრა ორი მშვიდობიანი მოქალაქე. სამოქალაქო ინფრასტრუქტურას სერიოზული ზიანი მიადგა.
კიდევ ერთხელ ხაზს ვუსვამთ, რომ სირიის არაბული რესპუბლიკის ტერიტორიაზე ისრაელის განმეორებითი იერიშები კატეგორიულად მიუღებელია. მკაცრად ვგმობთ მსგავს უპასუხისმგებლო ქმედებებს, რომლებიც სირიის სუვერენიტეტსა და საერთაშორისო სამართლის ძირეულ ნორმებს არღვევს და ვითხოვთ მათ უპირობო შეწყვეტას". – წერია განცხადებაში, რომელიც უწყების სპიკერის მარია ზახაროვას სახელით გავრცელდა.
შაბათს, 2 ივლისს საჰაერო იერიში განხორციელდა ალ-ჰამიდიას დასახლების მახლობლად, ტარტუსის სამხრეთში, სადაც რეგიონში რუსეთის მთავარი საზღვაო ბაზაა. ადამიანთა უფლებების დამკვირვებელი სირიული ჯგუფის ინფორმაციით, იერიშის სამიზნე "ჰეზბოლასთვის" მიწოდებული იარაღი იყო.