მოძალადე, პუტინისტურმა ჯგუფებმა დღეს რამდენიმე ლოკაციაზე ანტიდასავლური აქცია გამართეს. მათ ევროკავშირის წარმომადგენლობის ოფისთან ევროკავშირის დროშა დახიეს, შემდეგ კი დაწვეს.
სხვადასხვა ლოკაციაზე ანტიდასავლური ჯგუფებისგან ანტიევროპული და ძალადობრივი მოწოდებები ისმოდა. ევროკავშრის ოფისთან ყოფნის დროს ალტ ინფოს ლიდერის კოკა მორგოშიას ძალადობრივი მოწოდებების შემდეგ, შენობას კვერცკი ესროლეს. ადგილზე არავინ დაუკავებიათ. 
მოგვიანებით პუტინისტურმა გუფებმა პარლამენტის შენობასთან გადაინაცვლეს და აქციას იქ მართავენ. 
ცნობისთვის, საქათველოში არსებობს კანონი, რომელიც ევროკავშირის დროშის შეურაცხყოფას კრძალავს. მისი დარღვევის შემთხვევაში დამნაშავეს ფულადი ჯარიმა და 15-დღიანი ადმინისტრაციული პატიმრობა ეკისრება. 
***
2 ივლისს, გამთენიისას მთაწმინდაზე შსს-მ ძალადობრივი და ჰომოფობიური ჯგუფის 26 წევრი დააკავა. მათ შორის ზურა მახარაძე, ბექა ვარდოსანიძე, ირაკლი მარტინენკო და მამა-შვილი ფალავანდიშვილები.
ისინი Tbilisi Pride-ის დახურულ ღონისძიებას - ფესტივალს ეწინააღმდეგებიან და მისი ჩაშლა სურთ. სწორედ ამ საბაბით იყვნენ შეკრებილები დაკავების დროსაც. 
გარდა ჰომოფობიური მოტივისა, სავარაუდოდ, მოძალადე ჯგუფების დღევანდელი ქმედებები 3 ივლისს დაგეგმილ პროევროპულ აქციას უკავშირდება და ხელისუფლების მიერ არის ორგანიზებული, ისევე, როგორც მიმდინარე კვირას რეგიონებში გამართულ შეხვედრებზე მომხდარი ორგანიზებული ძალადობა საჯარო მოხელეების მონაწილეობით. 
დღეს რუსთაველზე გამოსულმა მოძალადეებმა თქვეს, რომ "თავიანთი ბიჭების გამოსვლას კიდევ ნახევარ საათს დაელოდებიან". 
პარლამენტის წინ შეკრებილი მოძალადეების ნაწილი ადგილზე გვიანობამდე დარჩენას გეგმავს, მათი თქმით, "პრევენციის მიზნით", რომ პრაიდის კვირეულის ღონისძიებამ რუსთაველზე არ გადმოინაცვლონ. თუმცა, მსგავსი რამ დაგეგმილი არ არის. Tbilisi Pride-ის ხელმძღვანელებმა მსვლელობის ჩატარებაზე უარი 2021 წლის 5 ივლისის გამო თქვა. ამ დღეს დილის 09:00 საათიდან ძალადობრივი ჯგუფები, ჰომოფობიური და სხვა საფუძვლებით, ფიზიკურად სასტიკად უსწორდებოდნენ ჟურნალისტებს და რიგით მოქალაქეებს, შესაბამისად, 18:00 საათზე დანიშნული მარში აღარ ჩატარდა.
2021 წელს ძალადობა პრემიერმინისტრმა ირაკლი ღარიბაშვილმა წაახალისა და მთელი პასუხისმგებლობა ლგბტქ უფლებადამცველ ორგანიზაციას დააკისრა, პოლიცია კი ადგილზე ძალიან მცირე რაოდენობით იყო წარმოდგენილი.